Accessibility links

Vener Mostafinnı iskä alu kiçäse özelü aldında


Başqortstanda yäşäp icat itkän tanılğan tatar cırçısı Wener Mostafinnıñ faciğäle wafatına ber yıl tuldı. Şuşı uñaydan 4 dekäbr könne Ufadağı “Oğni Ufı” mädäniät üzägendä cır sänğätebezdä sizelerlek ez qaldırğan talant iäsen iskä alu kiçäse ütärgä tieş ide. Bu çaranı oyıştıruçılar äytüençä, älege Xäter häm qäder kiçäsenä Başqortstannıñ baytaq qına sänğät ostaları kilergä teläk beldergän bulğan. Ämma alarnıñ baytağı, ayırıp äytkändä Başqort däwlät filarmoniäsendä eşläwçeläre, bu çarağa ber atnadan az ğına kübräk waqıt qalğanda älege Xäter kiçäsendä qatnaşa almayaçaqların xäbär itkän. Monı alar filarmoniä citäkçelegeneñ qatı kisätü yasawı belän añlatqan. Bu kiçädä qatnaşuçılarğa eştän quu belän yanağannar ikän. Tanılğan cırçı, Başqortstannıñ atqazanğan artistı Wener Mostafin bıltır 54 nçe yäşendä faciğäle töstä wafat bulğan ide. Wener äfände Başqortstanda yäşäp icat itüçe, başqort cır sänğäten üsterügä zur öleş kertüçe küp tatar sänğätkärläreneñ berse buldı. Filarmoniädä Wener äfände utız yılğa yaqın xezmät itte. Şuña kürä dä anıñ ülemenä ber yıl tulu uñayınnan Xäter kiçäsen filarmoniä citäkçelege üze dä äzerli alır ide, dip belderä “Oğni Ufı” üzägendäge kiçäne ütkärergä cıyınuçılar. Ä alar, kiresençä, bu eşkä üzläre ük ayaq çala. 4 nçe dekäbrgä bilgelängän kiçäne niçek kenä bulsa da ütkärergä ide, dip belderä Wener Mostafinnıñ tuğannarı häm çın dusları. Cırçılar kilergä qurıqsa da, tuğannarı häm duslarınıñ anı iskä alu çığışlarınnan, istäleklärennän torırğa da mömkin ul. Başqortstan däwlät radio häm telewidenie fondında 300 dän artıq cırı saqlana Wener Mostafinnıñ. Äle igelekle eşquarlar yärdäme belän, Qazanda, “Bars-media” prodyuserlıq üzäge studiäsendä anıñ utızdan artıq cırı kergän qompaqt tälinkä çığıp kilä.

Fänis Fätxi, Ufa.
XS
SM
MD
LG