Accessibility links

шимбә, 10 декабрь 2016, Казан вакыты 12:05

Sember tatarları çirattağı qorıltayğa äzerlänä


Sember tatarları avtonomiäse prezidiumınıñ soñğı utırışı çirattağı qorıltayğa äzerlek çaraların qaradı. Kön tärtibenä 10 ğa yaqın mäsälä quyılğan ide. Läkin qayberlären äytep kenä üttelär. Mäsälän, elek Tatar mädäni üzägenä birelgän, ämma satılğan “Oktäber” kinoteatrın qaytaruğa ömetsezlektän süz ozaytıp tormadılar.

Ölkä üzägeneñ Lenin rayonında mäktäpkäçä yäştäge balalarğa milli tärbiä birü torışı belän rayon mäğärif idaräse xezmätkäre Lyudmila Mixailova süz tottı. Tärbiäneñ töp maqsatı tolerantlıq, millätara mönäsäbätlärne nığıtu, watannı söyu xisläre tärbiäläw. Şunıñ nigezendä milli mädäniät belän tanıştıru. Avtonomiä prezidiumında mäğärif torışı öçen cawaplı Miherbanı Xösnullina rayon mäğärif idäräseneñ bu yaqtan eşçänlegenä yuğarı bäyä birde. Şatlanırlıq ällä ni bulmasa da. Rayon balalar baqçalarında 2227 bala tärbiälänä. Alarnıñ 18 fäize – tatar balaları. Alar öçen 25 baqçanıñ öçendä atnasına ike säğätlek tatar mädäniätenä bağışlanğan tügäräklär eşli. Anda 41 tatar balası cälep itelgän. “Tatar balalarınıñ 90 protsentı çaması bötenläy milli tärbiä almawına niçek qarıysız?” – digän sorawnı Lyudmila xanım qabul itmäde. “Barlıq baqçalarda da milli tärbiägä iğtibar birelä, muzeylarda milli poçmaqlar bar, ğomum däreslärdä dä milli kul''turalar belän tanışu bula”, -dide ul. Utırış isä mäğärif türäse birgän mäğlümatlärne tıñlaw belän çiklände.

Utırışta qaralğan ikençe töp mäs''älä - Qorıltayğa äzerlek çaraları. Tik elekke qorıltay saylap quyğan citäkçelekneñ almaşuına ğäcäplänüçelär dä buldı. Cäy könnärendä Avtonomiä räise Azat Kurçakovnıñ bu eştän kitüe turında xäbär bulğan ide inde. Xäzer anıñ urınbasarı Rifqat Äxmädullov ta 3 – 4 atna elek waqıtınnan irtä kitte. İsäp-xisap totqançı uq. Anıñ xuşlaşu çığışı säyerräk tä yañğıradı: 4 yıl buyı tırışıp eşläwen häm şul arada milli problemalarnı çişä alu däräcäsendä ölgergänlegen belderde. Soñ, ölgergäç, eşlärgä dä eşlärgä ide artaban. Anıñ wazifaları “Çişmä” televizion tapşıruı redaktorı Ramis Safinğa yöklänelgän ide. Avtonomiä räise wazifaların başqaruçı Roza Äxmätcanova anı yaña citäkçe sıyfatında prezidiumğa täqdim itte. Ramis Safin üzeneñ çığışında här tatarnıñ ber yodrıqtay uqmaşıp eşläwenä ömet häm ışanıç belderde. Äye, monısı küptän ölgergän mäs''älä. Uzğan qorıltayda avtonomiä räise urınına ikençe namzät sıyfatında Xanäfi Ramazanovnı täqdim itkän öçen, “Tuğan tel” oyışmasın milli tormıştan çitläşterü buyınça zur tırışlıqlar kürelde. Uzğan uturışlarnıñ bersendä Roza xanım barlıq oyışma, törkemnärneñ ğomum İctimaği Şurasın buldıru täqdime belän çıqqan ide. Ul waqıtta Azat Kurçakov kisken qarşı çıqtı. Bu yulı şul uq mä’säläne “Sember” isemle maltabarlar berlege prezidentı Färit Äyupov yänä kütärep çıqtı. Aña, gubernatornıñ kiñäşçese sıyfatında, törle mäs''älälär buyınça möräcäğät itärgä turı kilä. Bu ğözerlär artında barlıq tatar cämäğätçelege torsa, süz ütemleräk bulır ide, dide ul. Barlıq oyışmalar üz plannarın tözesennär, şulardan ğomum plan tözerbez. Häm anı tormışqa aşıru buyınça, barçabızğa da berdäm tırışırğa kiräk.

Qorıltayğa äzerlänü çaralarına kilsäk, rayonnardan delegatlar saylaw tärtibe raslandı, Ölkä başlığı, Qanunnar çığaru cıyılışı, BTK isemennän Räxmät xatlarına, ä avtonomiä isemennän büläklärgä layıq keşelärne barladılar. Qazannıñ 1000 yıllığı tantanalarında qatnaşqannarnı täqdim itmäskä buldılar.

Utırışnıñ tağın ber qararı turında äytep ütärgä kiräkter. Mäläkästä bıltır açılğan tatar mäktäbe direktorı Mönirä Djumaeva häm Pedagogiä universitetı möğallimäse Räzidä Sadıyqovağa Tatarstannıñ atqazanğan uqıtuçı isemen birüne yullarğa qarar qıldılar. Ä cirle şağirä İdelbikäne - Gonçarov isemendäge premiägä täqdim itärgä.

Ayrat İbrahim, Sember

XS
SM
MD
LG