Accessibility links

шимбә, 3 декабрь 2016, Казан вакыты 22:45

Mäskäw mäxkämäse Rodina partiäseneñ saylawlarda qatnaşuın tıydı


Mäskäv mäxkämäse Vatan (Rodina) partiäseneñ Mäskäv şähär Dumasına saylaularda qatnaşuın tıydı. Xakimnar saylaualdı kampaniäse rassalar arasında näfrät taratqan eçtälektä digän näticägä kilde. Bu qarar Vatan Partiäse citäkçeseneñ xakimiätlärne köçle oppozitsiädän qotılırğa tırışuda ğäyeplävenä kiterde.

Rodina partiäseneñ saylaualdı kampaniäsendä Noyäber başlarında televideniädä kürsätelgän iğlanı baştan uq zur şau-şuğa säbäp buldı. İğlanda Qaratänle berävneñ qarbuz qabıqların taşlauı , Vatan partiäse citäkçeläreneñ şul sanda Dmitri Rogozinnıñ şul ir attan qabıqlarnı cyuın taläp itüläre sürätlängän häm Mäskävne Çüptän tazartıyıq digän şiğar belän tämamlanğan ide. İnde Mäskäv şähär mäxkämäse xäzer Rodinanı saylaularda qatnaşudan mäxrim itkäç, bu märtäbä Rodinapartiäse şau şu quptardı. Partiä şunduq belderü belän çıqtı häm Mäxkämä Mäskäv xakimiätläre kontrolendä, cirle xökümät monopolen saqlap qalırğa teli dip bäyan itte. Rogozin üze radiobıznıñ Rus redaksiäsenä birgän ängämäsendä mäxkämä bu qararı belän qanunnarnı bozdı häm xökem qararı fars dip belderde. Ul şulay uq bu qarar xakimiätlärneñ Rodinadan qurquın da çağılıra dip äytte.

"Problemma iğlanda tügel. Mäsälä Rodinanıñ Mäskäv Şähär Duması saylaularında kisken problemalarnı kütärep çığuında. Alar rişvätçelek, migratsiä militsiäse belän mönäsäbätlärgä qarıy. Şul säbäple alar bezdän qurqalar häm saylaularda aldınğı köndäştän qotılu yağın qaradılar."

Xäzerge vaqıtta Rodina cirle parlamentta öçençe urında, läkin xalıq fikeren beleşülär , alarnıñ Kreml yaqlı Berdäm Rusiädän bik artta bulsa da ikençe urın biliäçägen kürsätä. Şul säbäple qayber küzätüçelär xakimiätlärneñ çınnan da Vatannan qotılırğa telävlär mömkin digän fiker belderälär. Mäskävdäge Carnegie Üzäge küzätüçese Nikolay Petrovnıñ süzlärençä, Rodina nıqlı politik köç häm bu skandal anıñ populärlegen tağı da üsterä ala.

"Citäkçeläre küpertep kürsätsä dä, Rodinanıñ vazğiäte nıq. Ul saylaularda qatnaşqan xäldä, 10-12 protsentı tauış alır ide dip äyter idem. İnde xäzerge skandal häm mäxkämä qararınnan soñ anıñ populärlege tağı da arta ala."

Rodina şundıy uq şiğarlar astında kampaniä alıp barğan häm ideologiäläre oxşaş Liberal Demokratik Partiäneñ şikayäte säbäple tıyıldı. İke partiä dä migrantlarğa qarşı häm alar ideologik köndäş. İnde Rodina tıyılğannan soñ, anıñ taraftarlarınıñ Jirinovskiynıñ Liberal Demokratik Partiäsneä tauış birüläre ixtimal. Rodinanıñ saylaualdı kampaniäse belän riza bulmağan keşe xoquqları aktivları da, mäxkämä qararınıñ nindi şartlarda qabul itelgän buluına borçılalar. Alarnıñ berse Keşe xoquqları öçen Böten Rusiä xäräkäte başqarma direktorı Lev Ponomarev bolay dide

"Saylaualdı iğlanı yaman ide häm mäxkämä qararı da ğadel. Läkin, mine mäxkämägä şikayätneñ LDPRdan kilgän buluı borçıy. Rodina ber demokratik partiäneñ şikayäte säbäple tıyılğan bulsa, yaxşıraq bulır ide. Çönki LDPR da provokatsiälävçe oyışma häm millätçelekne qızdırıp cibärä."

Rogozin radiobızğa xökem qararına şikayät belderäçägen häm partiä kandidatlarınıñ yaña qararğaça üz kampaniälären dävam itteräçäklären belderde. Ul şulay uq appelatsiäse kire qağılğan xäldä, partiä xakimiätlärgä qarşı parlamenttan tış metodlar belän köräşüne dä küz aldında tota dip kisätte.

Färit İdelle, Praga.
XS
SM
MD
LG