Accessibility links

шимбә, 10 декабрь 2016, Казан вакыты 21:40

Qazandağı yäşlär xäräkäte Mäskäwdäge şovinistik firqälärgä qarşı çıqtı


Mäskäwdä «Rodina» häm «SPS» firqäläre qapma qarşı şiğärlär belän ütkärelgän aksiälärgä qarata Tatarstanda reaksiä belderälär. Belgänegezçä, Rusiä başqalasında demokratlar faşizmğa qarşı piket uzdırğan bulsa, «Qanunsız migrantlarğa qarşı oyışma» «Rodina» firqäse belän berlektä, ul’tra radikal taläplär belän çara uzdırğan. «Bez»«Mı» digän respublika ictimaği xäräkäte, millätara duslıq yaqlı bez dip, Mäskäwçädäge waqiğalarğa qarata qarşılıq belderde. Äflisun inqilablarına qarşı torır öçen oyıştırılğan älege xäräkät, bügenge könneñ iñ zur bäläse itep, millätara nizağlarnıñ kilep çığuın kürä.

«Bez», «Mı» digän respublika ictimaği xäräkäte, Tatarstanda äle yartı yıl ğına eşli. Täcribä bik az buluın qaramastan, kiçä bulğan waqiğalarğa qarata bügen ük mönäsäbät kürsätergä, matbuğat wäkilläre aldında belderülär yasarğa, şaw-şulı çaralar uzdırırğa öyrängän inde alar. Belgänegezçä, Tatarstanda äflüsin inqilabların buldırmaw maqsatınnan oyıştırılğan xäräkät bu. Başqa alar yäşlärgä qurqınıç tudıra torğan oyışma itep Ukrainadan kilgän «Pora» oyışmasın atap, alarğa qarşı torırğa öndägän ide. Xäzer, doşmannar rätenä «RNE», «Rodina», «Da», «Qanunsız emigrantlarğa qarşı» oyışmalarnı da kertä. 28 noyäber könne, «Mı» xäräkäte Xalıqlar duslığı yortında tarafdarların cıyıp, maxsus çara ütkärde häm anda üzläreneñ belderülären yasadı. Älege çaranıñ maqsatı turında «Bez»,«Mı» xäräkäte citäkçeläreneñ berse Emil Ğöbäydullin bolay dide: «Rusiädä häm Tatarstanda törle şovinistik, faşist xäräkätlär barlıqqa kilä başladı, alar bezneñ yäşlärgä tä’sir itä, bu bik naçar, alar tağın urıs bulmağan millätlärgä bäylänälär, ärmännär, azerbaycannar, çeçennar şovinist häm faşistlarğa qarşı torır öçen, berläşergä tieş, bez alarğa bu eştä yärdäm itärgä cıyınabız.» Qazandağı «Bez» xäräkäte wäkilläre, Mäskäwdäge «Rodina» firqäsenä yaqın radikal urıs millätçe xäräkätlärgä qarşı çığuın , millätlär duslığın yaqlawı belän añlatalar. Ämma, şul uq waqıtta, faşizmğa qarşı piket uzdırğan «Uñ köçlär berlege» häm «Alma» çılar da respublikanıñ «Bez» xäräkäte tarafınnan qara isemlekkä kergän. Ber-bersen inqär itkän säyäsi oyışmalarnı nigä ber taqtağa quyıp, ğäyplisez digän sorawğa «Bez» xäräkäte citäkçese Artur Şihapov « Äye, törle şiğärlär belän çıqtılar, ämma bergä uramğa çıqqannar alar», dip cawap birde. «Mı» xäräkäte wäkile Artur Şihapov ber yaqtan, «Alma»çılar häm SPSnnı ğäyepli, ämma ikençe yaqtan, şul uq demokratlar kütärep çıqqan antifaşistik idealarnı üze qabatlıy. Mäsälän, «Bez» xäräkäte xalıqlar duslığı yortında ütkän oçraşuda, studentlarnı şovinistik ruxtağı «RNE» «Russkoe natsionalnoe Edinstvo» oyışmasına kermäskä çaqırdı. Anıñ süzlärençä, älege oyışmanıñ reklam käğäzläre, Qazan däwlät universitetında häm şähär üzägendä küpläp taratıla. Çarada bulğan çittän kilüçe yäşlär çığış yasadı. Mäsälän, çeçen yäşläreneñ wäkile Tamırlan İsayev, bez, Tatarstanda irken yäşibez, dip belderde. Ägär monda kilüçelärne qısalar ikän, monıñ, alarnıñ tuğan yaqlarında da qaytawazı bulaçaq, dide ul. Udmurtiädä tatarlarğa basım bulsa, Tatarstandağı udmurtlarnıñ da xäle awır bulırğa mömkin, digän misal kiterde çeçen yäşläre wäkile Tamırlan İsaev.

Quşma millätle ğailädä tuğan Viktoriä Çerkesova, şovinistlarnı kürep, irtägä bezdä dä, çittän kilüçelärne quya başlarlar, dip qurrtıq, dip belderde. Oçraşuda bulğan ber 20 student çığış yasawçılarnı alqışlar belän xupladı.

Törle millätlärdä qarşı yünälgän säyäsi köçlärgä qarşı torır öçen, bu xäräkät, törle millätlärneñ mädäniäten kürsätüçe konsert oyıştorırğa täqdim itä.

Bikä Timerova.

XS
SM
MD
LG