Uzğan yäkşämbedä böten il Analar könen bäyräm itte. Analarğa bağışlap Tatarstannıñ da här şähär-rayonında räsmi çaralar ütkärelde. Rusiädä Analar köne berençe tapqır monnan sigez yıl elek bilgeläp ütelde. Yılnıñ här köne nindider hönärgä, isem, cisemgä bäyläp bilgeläp ütelgän waqıtta, nihayät, maxsus Analar köne barlıqqa kilü zur ömetlär dä tudırğan ide.
Analar köne barlıqqa kilüdän xalıq ällä nilär ömet itte. Yänäse, analar turında çın qayğırtu başlanır, alarğa matdi ciñellek tä kiler. Ömet beraz ğına aqlanğandır da bälki. Berniçä yıl balalarğa tülänä torğan posobielär 500-600 sum bulıp aldı. Ämma bügen analar 70 sumğa bala üsterergä mäcbür. Taşlamalarnı aqçağa alıştıru turındağı zakon iñ awır yıllarda 3-10ар bala tärbiäläp üstergän millionlağan ananı xätta transportta buşlay yörü bäxetennän dä mäxrüm itte. Statistlar bügen 2015 yılda ber eşläwçegä ber pensioner turı kiläçäk dip farazlıy.
Tatarstanda küp balalı analar turında az bulsa da qayğırtu bar. Biş häm annan da kübräk bala üsterüçe analarğa “Ana danı” medale birelä. Şunıñ östenä här bala öçen 1000 sum aqça da. Respublika xalqın adreslı sotsial' yaqlaw zakonı nigezendä keremnäre az bulğan häm küp balalı ğailälärgä yärdäm kürsätelä. Mäsälän, 2 yäşkä qädärge balalarğa söt aşamlıqları, 3 yäşkä qädärgelär darular belän tä'min itelä, aylıq keremnäre yäşäw minimumınnan da kimräk bulğan ğailälärneñ balaları şähär yanı sälämätländerü lager'larında, şifaxanä-profilaktoriylarda buşlay yal itä, transportta yörü öçen aqça ala. Elekke yıllarda küp balalı ğailälärneñ toraq şartların yaxşırtu öçen respublika byudjetında yıl sayın maxsus aqça buldırıla häm kemnärder fatirlı da bula ide. Bıyıl 1nçe marttan yaña Toraq kodeksı ğämälgä kerü säbäple, andıy igelekle eş eşlänerme, anısı älegä bilgesez.
Ber balanı üsterü dä mäşäqätle, çığımlı bulğan bügenge zamanda öç, dürt, un bala üsterüçe ğailälär dä bar. Respublikada alar 31 meñ. Häm alarnıñ sanı yıldan yıl kimi bara. Düşämbe könne Tinçurin teatrında analar könenä bağışlanğan maxsus konferensiä uzdı. Anı Qazannıñ mäğärif idäräse, “Äniem-Mama” fondı häm “Bolğar” milli xäyriä üzäge oyıştırdı. Konferensiägä böten respublikadan küp balalı analar, mäğärif oyışmaları citäkçeläre, uqıtuçılar cıyıldı.
Änilär köne uzdı. Änilärgä bağışlap matur-matur süzlär äytelde. Bigräk tä küp balalı analar iskä alındı. Ämma çinovniklar da, ir-atlar da istän çığarmasqa tieş - bezneñ zamanda ber bala anası bulu da qaharmanlıq.
Al'bina Zäynulla
