Mäğlümat çaraları ölkäsen bağuçı vitse-premyer häm mädäniät ministrı Zilä Wälieva, düşämbe könne, Mäskäwdä, Mäğlümat çaraları agentlığınıñ utırışında qatnaşqan. İnde sişämbedä bilgele bulğança, anda süz, cämğiät öçen möhim proyektlarğa däwlätneñ yärdäme turında süz barğan. Yäğni, däwlät, mäğlümat çaralarına zakaz birä, ä ul alarnı üti. Mäsälän, Tatarstannıñ Mäğlümat çaraları 57 tapşıruğa Rusiä mäğlümat çaraları ağetnlığınınan grant bülep birüne sorağan, ämma alarnıñ 14 genä bäygedä ütkän. Alar - Qazannıñ 1000 yıllğına bağışlanğan tapşırular, analar häm balalar turında, milli ğöref ğädätlär, şiğri säxifälär kebek programmalar bulğan. Belgänegezçä, Tatarstanda da, mäsälän tellär turındağı qanunın tormışqa aşıru öçen, respublika, räsmi mäğlümat çaralarına grantlar birä. Läkin, şul uq waqıtta, räsmi matbuğat, däwlättän daimi subsidiälär alıp tora.
Bügenge «açıq mikorfon» säxifäsendä, matbuğat, TV häm radio däwlättän açqa alırğa tieşme yuqmı, tatar gäzitläreneñ uquçıları barmı, digän soraw quyıp, Qazan uramnarında soraştıru ütkärdek. Menä alarnıñ näticäläre : Ber yäş student qız «Min tatar gazetaların uqıym. Kübesençä respublika külämendä çığa torğannarın. “Atna” kebek gazetalarnı min uqımıym. Çönki alar sarı matbuğat. Min alarnı üzemä kiräkle dip tapmıym.»dip cawap birde. Urta yäştäge xanım :«Watanım Tatarstan”, “Tatarstan yäşläre”n yaratıp uqıybız. Läkin böten yazğannarğa ışanıp betmibez. Işanğan waqıtlarda bula inde», dide. Kibettäge satuçı xanım «Tatar gazetaları kübräk däwlätneke bulsa äybäträk bulır ide. Nik digändä, yazmaları döres kebek. Annan soñ däwlät tä yärdäm itärgä tieş. Ayıruça milli basmalarğa.» digän fiker belderde. Pensioner abzıy :«Tatarçanı uqımıybız, çönki rus möhitendä üstek. Xäzer menä ni rus tügel, ni tatar tügel kebek üzebezne xis itäbez.» dide. Uqıtuçı xanım «Min uqısam säyäsi tatar gazetaların uqırğa yaratam. Däwlät tatar gazetalarına iğtibarnı bik az birä. Alarnıñ xälen yaxşırtır öçen yärdämen qızğanmasın ide.»,-dide.
