Accessibility links

җомга, 9 декабрь 2016, Казан вакыты 14:38

Xoquq saqçılarına qarşı cinayät eşläre quzğatıldı


Rusiäneñ General' prokuraturası Qazannıñ Yaña-Savin rayon mäxkämäseneñ elekke xäkime Emil' Ganievqa qarata cinayät eşe quzğatqan. Ganievqa qarşı quzğatılğan sud eşe çit ildän zakonsız räweştä kertelgän avtomobil'lär kertü belän bäyle. Bilgele bulğança, Rusiägä çit ildän avtomobil'lär kertü Belorussiädän kertügä qarağanda küpkä qimmätleräk. Ä monıñ eş sisteması bolayraq: Belorussiädä cinayätçelärneñ tanış keşeläre bulıp, yalğan dokumentlar qullanıp çit ildän avtomobil'lär kertälär. Ä annan soñ yänäse bu avtomobil'lär Rusiä watandaşlığı bulğan keşegä satılğan bulıp çığa. Satıp aluçılar Rusiä territoriäsenä avtomobil'lärne zakonlı räweştä kertü turında tanıqlıq sorap kilgäç, älbättä uñay cawap ala almıylar. Satıp aluçılar üz mänfägat'lären yaqlap mäxkämägä möräcäğät tiergä mäcbür bulalar. Ä sudta inde qayber "xoquq saqlawçılar" aldan uq yalğan qarar qabul itälär. Bu qararlar nigezendä tamojnya xezmäte zakonlı räweştä kertü turında tanıqlıqlarnı birä. Şunnan soñ bu maşinalarnı zur şähärlärgä alıp kitep, avtosalonnarda zur summalarğa satalar (älbättä yalğan dokumentlar belän). Şuña oxşağan ısul belän Qazannıñ Yaña-Savin rayon mäxkämäseneñ elekke xäkime Emil' Ganiev ta eş itkän. Tatarstan prokuror yärdämçese İldar Möxämmätcanov belderüençä, 2000 yılda uq inde respublika tamojnyası aşa yalğan dokumentlar qullanıp 43 avtomobil' kertü faktı bilgele bulğan. Läkin tamojnyanıñ älege qararına qarşı Emil' Ganiev çığa häm bu qararnı zakonsız dip belderä. Tatarstan Respublikası prokuraturası Emil' Ğaniewnıñ zakonsız qararların tikşerep alarnı kire qağa. Monıñ näticäsendä Ğaniewnı eşennän azat itälär. Häm aña qarşı cinayät eşe quzğatıla, dip xäbär itä İntertat elektron gäzite.

Şulay uq, şuşı könnärdä tağın ber xoquq saqçığa qarşı cinayät eşe başlanğan. Monısı inde Aqtanış rayonında yäşäwçe 39 yäşlek mayor. Anı totqarlawnıñ säbäbe - rişwät alu. Älege mayor talawda ğaıplängän ber yäş yegetneñ sud eşen tikşergän bulğan. Bu yegettän soraw alğan waqıtta sud eşen "yomşartu" öçen aqça sorağan. Aqçanı yegetneñ abıysı tikşerüçeneñ öyenä kiterep birgän. Şunnan soñ mayor yegetneñ änise yanına kilep, tağın 25 meñ sum aqça sorıy häm yegetkä birelergä tieşle cäza şartlı ğına bulıp qalırğa mömkin dip wäğdä itä. Läkin xanım mayor süzlärenä ışanmıy häm Eçke eşlär ministrlığınıñ üz iminlegen saqlaw idäräsenä Aqtanış rayonınıñ eçke eşlär bülege tikşerüçese malayınnan 25 meñ sum külämendä aqça sorağanlığın belderä. Ä bit mayor eçke eşlär bülegendä inde 1989 yıldan birle eşlägän häm bilgele bulğança, ağımdağı yılda ğına Qazannıñ yuridik institutın tämamlağan yuğarı belemle xoquq saqçısı!

Şunı äytergä kiräk, Rossiyskaya gazetanıñ 30 noyäber sanındağı ber mäqälädä, federal' ezlänügä quyılğan ber cinayätçe xanım familiäsen alıştırıp, xäkim känäfiendä keşelär yazmışın xäl itep utıruı açıqlanğan.

Gölnaz Şäyxetdin

XS
SM
MD
LG