Accessibility links

якшәмбе, 4 декабрь 2016, Казан вакыты 13:22

Kiev könbatışqa şuışa - Yewropa Ukrainanı bazar iqtisadli il dip sanıy başladı


Kievtä Ukraina häm Yewropa Berlege citäkçelege arasında barğan yuğarı däräcäle oçraşuda Yewropanıñ Ukrainanı bazar iqtisadı qorılğan il bularaq qabul itä başlawı iğlan itelde, xörmätle tıñlawçılar. Yewropa Berlege moñardan tış Ukrainanıñ Dönya Säwdä oyışmasına kerüen yaqlayaçağın, häm ike arada irekle säwdä urnaştıru plannarı xaqında fiker alışırğa äzer buluın belderä.

Yewropa Berlegeneñ Ukrainanı bazar iqtisadlı il bularaq qabul itä başlawı anıñ Yewropa belän mönäsäbätlären ber tön eçendä genä tamırdan üzgärtä almasa da, prezident Yuçenko xökümätenä simvolik etärgeç birä. Bu xaqta formal'' belderüne Kievtä, Yewropa Berlegendä räislek itkän Britaniäneñ premyer-ministrı Tony Blair yasadı.

"Işanam ki, bügenge oçraşu Yewropa Berlege belän Ukraina arasında bulğannarınıñ iñ uñışlısı bulmasa, ul kiläçäk öçen köçle ber işarä bulıp tora. Sezne ışandıra alabız - urtaq kiläçäk yulında Yewropa Berlege häm Britaniä kebek illär sezneñ yaqın berektäşlär bulaçaq", di britan premyer-ministrı Blair.

Yewropa komissiäse räise Jose Manuel Barroso isä Ukrainanıñ bazar iqtisadına taba bik ozın yulnı bik qısqa waqıt eçendä ütüen äytte. Kievneñ bu ölkädäge uñışların tikşerü öçen yewrokomissiä maxsus texnik tikşerenü ütkärgän ide, häm şunıñ näticäläre Ukrainanıñ bar taläplärne dä ütäwen kürsätkän. Prezident Yuçenko üz qänäğätlänüen yäşermi:

"Bügenge oçraşunıñ möhim näticäse bulıp, Ukrainanıñ bazar iqtisadlı il bulu öçen bar 5 töp texnik taläpne dä ütäwen tanu, şuşı säyäsi qararnıñ tieşle räweştä ğämälgä kerüe bik ozaqqa suzılmas", digän ömet belderä Ukraina prezidentı Viktor Yuçenko.

Küzätüçelär fikerençä, pänceşämbe könne qabul itelgän bu qararnıñ säwdä ölkäsendäge qulaylıqlarına qarağanda säyäsi ähämiate zurraq. Hiçyuğı, yaqın kiläçäkne istä totqanda bu şulay. Prezident Yuçenko, misal öçen, Ukrainanı bazar iqtisadlı il dip tanu anıñ Yewropa Berlegenä quşılu yulında zur täräqqiatkä ireşüen kürsätä dip isäpli, yäğni ul üz ileneñ kiläçäktä Yewropa belän berläşüenä ömetlänä.

"Bez şuşı strategik säyäsät, strategik maqsat - yäğni Yewropağa quşılu teläge qısalarında xäldän kilgänneñ barın da eşliäçäkbez, Yewropa keşelärenä Ukrainanıñ Yewropa Berlegenä kerüe östämä awırlıqlar kitermäwen, kiresençä, faydağa ğına bulaçağın kürsätäçäkbez", dip ışandıra Ukraina prezidentı.

Äle şuşı könnärdä genä äflisun inqilabınıñ beryıllığın bilgeläp ütkän Ukrainada Viktor Yuçenko beryaqtan, sulçılar häm Rusiä belän berläşüne yaqlawçılar, ä ikençe yaqtan, äflisun inqilabınnan kübräk kötkännär tarafınnan tänqitlänä. Xäzer isä, Yewropa Berlegeneñ Ukraina uñışın maqtap telgä aluı aña ber teräw bula ala. Ämma Yewropanıñ xäzer Kievkä qarata başqa ölkälärdä dä taläpçänlege artaçaq - berençe çiratta, kiläse martqa bilgelängän parlament saylawların irekle wä ğadel ütkärü kiräk bulaçaq. Annan soñ inde Ukraina qanunnarın Yewropa Berlege standartlarına turı kiterü başlana ala.
XS
SM
MD
LG