Accessibility links

якшәмбе, 4 декабрь 2016, Казан вакыты 11:22

Üzbäkstannan kilgän millättäşlärebez Qazan belän tanışa


Üzbäkstannıñ Taşkent häm Sämärqand şähärlärennän kilgän 10 millättäşebezneñ barısı da inde olı yäştä. Tarixi watannarın kürü teläge belän yanğannar. Bötendönya tatar kongressı Başqarma komitetında uzğan oçraşu barışında da alar möhim problemalar kütärmädelär. Kongress xezmätkäre Röstäm Gaynetdinov Tatarstan belän tanıştırdı, kongress eşçänlege turında söyläp uzdı. Küptän tügel genä Qazaqstannan kilgän millättäşlärebez Yaña Ğasırnı qararğa iärçen tälinkäse, komp'yuter, kitaplar sorap kilsälär häm töyäp alıp ta kitsälär, Üzbäkstandağı millättäşlärebez bernindi problemaları yuqlığı turında belderdelär. Taşkent şähärendäge tatar mädäni-ictimaği üzäge idärä äğzası, delegatsiäneñ citäkçese İyünn Möxämmät'yanov

Millättäşlärebez yaxşı yäşi. Yäşlärgä ğöref-ğadätlärebezne onıtmasınnar öçen kiçälär uzdırabız. Taşkenttağı üzäktän barısı da böten xäbärne alıp tora.

Üzbäkstandağı tatarlar Tatarstan basmaların aldırmıylar ikän, üzlärendä dä tatar gazetası näşer itelmi. Şulay uq Tatarstan televideniesen dä qaramawları xaqında äyttelär. Üzbäkstannıñ üzendä ike atnağa ber tapqır “Miras” digän televizion tapşıru çığa. Anda kübräk tatar cırçılarınıñ konsertları, Tatarstanda häm Başqortstandağı törle kiçälärne kürsätälä di. Bu tapşırularnı Tatarstannıñ Üzbäkstandağı tulı wäqälätle wäkile internet aşa ala ikän. Radioda atnasına ike tapqır tatar, ikençe atnada ike tapqır başqort telendä tapşırular çığa. Kiläçäktä alar Tatarstannan tuğan telebezdäge jurnalları aldırırğa niätlilär ikän.

Qazanğa millättäşlärebez berençe çiratta tarixi Watannarı belän tanışırğa kilgännär . Pänceşämbe könne alar Qazannıñ 1000 yıllıq muzeenda, Qol-Şärif mäçetendä, İske tatar bistäsendä häm Qazannıñ başqa tarixi urınnarında buldılar. Millättäşlärebez Qazannıñ maturlığı belän tañ qaluları turında belderdelär häm kilüebez yuqqa tügel ikän didelär. Comğa könne alar Bilär muzey-tıyulığına baraçaqlar. Monnan tış öç könlek säfär qısalarında mädäni çaralar belän tanışaçaqlar, yäğni G. Kamal teatrında “Äldermeştän Älmändär” spektaklen, Räsim Nizamov konsertın qarayaçaqlar. Şulay uq programmağa G. Tuqay, S. Säydaşev, B. Urmançı muzeyları belän tanışu da kergän.

Landış Xarrasova

XS
SM
MD
LG