Accessibility links

Кайнар хәбәр

Tömändä 25 yäşlek İlnur kürgäzmäse


Wağay rayonınıñ Qarağay awılında yäşäwçe rässam İlnur Säfäräliewnıñ ike räseme Tömändä totqarlanaçaq. Tıñlawçılarıbız Mäskäwdäge Puşkin muzeyneñ kartinaları Şveysariädä totqarlana yazğan kebek räsemnärgä höcüm modası Tömän ölkäsenä dä kilep citkän ikän dip uylıy kürmäsen. Ölkä fänni kitapxanäneñ milli ädäbiätlär bülegenä elengän 12 räsemneñ ikesen, ber kemgä dä birmägez, min satıp alam, dip teläk belderüçe bulğan. Kitapxanägä kilgännär matur häm fänni ädäbiät belän tanışqaç İlnur Säfäräliewneñ räsemnären qarap xıyalda ğına bulsa da tabiğät xozurına: kül buylarına, urman alannarına barıp kilä alalar.

“96 nçı, 97 nçe yıllarda çınlap torıp qulıma pumala aldım. Üzem räsem sänğäte turında ükim, öyränäm. Räsemnäremne yäşlärgä büläk itäm. Satıp aluçılar da bar. Kinder bulmağanğa, DVP ğa yasıym. Buyaularnı Tobolğa barıp alam. Awılda eş yuq. Äti dä, äni dä, señelem dä eşlämi”,- di İlnur.

İl'nur Säfäraliev räsemnären sul qulı belän yasıy. Ul tumıştan ğärip. Räsemnären täqdim itü kiçäsendä Tömänneñ sınlı sänğät muzey xezmätkäre Vera Tuşnolobova da qatnaştı. “Tuğan yaqqa eçkersez mäxäbbät küñelne quandıra. Qatlawlı, awır tormışta, sazlıqlar arasında yäşäwçe yegetneñ tirä yaqtağılarnıñ küñelen yuandırırlıq räsemnär yasawı da bügenge köndä zur äyber”,- di Tuşnolobova.

Räxmätlär däftärendä: “İlnurnıñ räsemnäre belän tanışqaç, seber tatarlarınnan da ber kürenekle rässam çığar digän ömetlär uyattı”, dip yaza veteran uqıtuçı Lyutsiä Xäbibullina. Mönciä äbi: “Mondıy talant xodaydan iñgänder dip uylıym. Qıyınlıqlarğa bireşmä. Qosıq, yäğni kedr urmannarın da kürsät bezgä. Kübräk üzebezneñ peyzajnı yasa”,- digän üteneçen qaldırğan. Natal'ya Ustyugova isä: “Miña İlnurnıñ icatı bik oşadı. Bigräk tä qış küreneşläre. Qızğanıç ul räsemnären atamağan. Rässamnıñ üz icatına eçke mönäsäbäten dä beläse kilgän ide»,- digän.

Nail Alan. Tömän

XS
SM
MD
LG