Accessibility links

якшәмбе, 4 декабрь 2016, Казан вакыты 02:57

M.Şäymiev: Bez üzebezne üzebez beterü yulınnan bara almıybız


“Tatarstan” jurnalınıñ berençe sanı monnan näq 85 yıl elek 1декабрьдә dönya kürgän. Basma üz isemen, formatın alıştıra-alıştıra, berara çığudan tuqtap torıp bügenge sıyfatına kilep citte.

1998 yılda “Tatarstan” jurnalına bäya birgändä Tatarstan prezidentı älege basma respublikanıñ vizit kartoçkasına äwerelergä tieş dip äytkän ide. Monıñ öçen jurnal xezmätkärläre zur tırışlıq kürsätte. Ämma älege basma aldında respublikanıñ başqa mäğlümat çaraları kebek ük üz üzlären finanslaw burıçı quyılğan. Jurnal monı buldıra, läkin barı tik ber şart belän, dide jurnalnıñ baş möxärrire Rifat Fättäxov. Monıñ öçen “Tatarstan” jurnalınıñ tatarça variantın beterergä kiräk. Läkin prezident älege fikerne şunduq kire qaqtı:

Bez awırlıqlarnı ciñärgä tieş. Şunıñ öçen bez üz xoquqlarıbız turında belderdek tä. Läkin mondıy yullar belän tügel. Bez üzebezne üzebez beterü yulınnan bara almıybız. Tatar häm rus tellärendä çığuçı basmalar aldında mondıy soraw ğomumän tuarğa tieş tügel. İke teldä çığuçı basmalar yä ike teldä çığa, yuq ikän - berse ikençese xisabına yäşäp qalırğa xaqı yuq. Bigräk tä bügenge şartlarda - respublikada ike tellelek, tolerantlıq, millätara häm dinara tınıçlıq bulğanda basmalarnıñ ike tellelegen saqlap qalu bik möhim.

Mintimer Şäymiev şulay uq “Tatarstan” jurnalınıñ elek bol'şeviklar basması buluın iskä alıp, bügen älege jurnal säyäsi firqälär turında az yaza dide. Monı tözätergä kiräk, çönki “Tatarstan” jurnalı bu xaqta yazmasa, başqalar yazır dide ul.

“Tatarstan” jurnalınıñ redaksiäsendä prezident qatnaşlığında barğan oçraşu fäqät tatar telendä alıp barılsa da, axırda M.Şäymiev tatarça da söyläp aldı. Ul tatar mäs’äläsen kütärde

Tatar telenä iğtibar yuq, däwlät tarafınnan tieşle säyäsät ütkärelmi dip äytsälär, min moña çın küñeldän räncer idem. Xökümät qulınnan kilgänen eşli. Şul çıqlı ozaq yıllar telne yuğaltqannan soñ, nindider un yıl eçendä telne “ayaqqa bastıru”, bigräk tä bügenge zamanda, bik awır.

Axırda Mintimer Şäymiev redaksiäneñ kollektivın bäyrämnäre belän qotlap, redaksiägä “Tatarika” atlasın büläk itte. Jurnalnıñ bäyräm çaraları isä däwam itä. 16 dekaberdä Salix Säydäş isemendä zur konsertlar zalında tantanalı kiçä dä ütkäreläçäk.

Al'bina Zäynulla

XS
SM
MD
LG