Kiev -- Elekke sovet blogına kergän 9 il töbäktä demokratiäne üsterüne maqsat itep quyğan yaña oyışma tözede. "Demokratik saylaw bergälege" dip atalğan oyışmağa Ukraina, Gruziä, Moldova, Latvia, Litva, Estoniä, Makedonia, Romania häm Sloveniä kerde. Şuşı 9 ilneñ prezidentları bügen Kievta bu turıda deklaratsiä imzaladı. Tantanada töbäktäge başqa il wäkilläre dä qatnaştı. Yaña berläşmä töbäktä demokratiä häm xezmättäşlekne üsterüne maqsat itep quya. Qayber küzätüçelär anı Mäskäwneñ elekke sovet illärenä yoğıntısın kimetü niäte dip sanıy. Nigez saluçılarnıñ berse, Ukraina prezidentı Viktor Yuçenko bu fikerne kire qaqtı: "Bezneñ bu başlanğıç nindi dä bulsa 3nçe ilgä qarşı tügel. Kiresençä, min bu berläşmäne duslarnıñ, demokratiä häm qanun tarafdarlarınıñ açıqça söyläşü urını itep küräm, dide Ukraina prezidetı. Çaqıru Rusiä prezidentı Vladimir Putinğa da cibärelgän bulğan. Ämmä ul anda üze barmağan, ilçelek wäkilen cibärgän dielä.
