Accessibility links

шимбә, 3 декабрь 2016, Казан вакыты 07:52

Ufağa çit illär wäkillekläre kilde


Comğa könne Başqortstanda bäyräm tantanaları xökem sörde. Respublik citäkçelege başlanğıçı belän Awıl xucalığı eşçännäre köne zurlap bäyräm itelde. Barlıq rayonnardan awıl xucalığında zur uñışlarğa ireşkän ğädi eşçännär dä, xucalıqları häm rayonnarı uñışlı eşlägän citäkçelär dä Ufağa tantanalı cıyılışqa häm bäyräm kiçäsenä çaqırıldı. Älege bäyräm şatlığın urtaqlaşırğa Ufağa Rusiä Awıl xucalığı ministrı urınbasarı Sergey Mitin da kilep töşte.

Bäyräm çarasında qatnaşuçılar Ufanıñ Neftçelär mädäniät sarayına cıyıldı. Anda prezident Mortaza Räximov awıl xucalığındağı uñışlar xaqında zur doqlad belän çığış yasadı häm xezmät aldınğılarına Başqortstannıñ häm Rusiäneñ büläklären tapşırdı. Prezident üze dä büläksez qalmadı, bilgele. Mäskäwdän kilgän qunaq Sergey Mitin da Mortaza Räximovqa berniçä törle büläk häm diplom tapşırdı.

Tantanalı utırışta Başqortstandağı awıl xucalığınıñ uñışları xaqında süzlär küp bulsa da, çınlıqta respublik awıl xucalığı tarmağı awır çorların kiçerä. Bäysez iqtisad belgeçläre tikşerenüläre buyınça, Başqortstan igençelektä dä, malçılıq tarmağında da yıldan-yıl tübän tägäri. Räsmi xaqimiätlärneñ kolxozlarnı taratuğa yul quymadıq dip şapırınuları da maqtanuğa nigez bula almıy, dip belderä wäzğiätne yaxşı belüçe iqtisadçılar. Näq menä kolxozlar häm sovxozlar däwlättän millinlağan sumnar yärdäm alıp, tieşle näticägä ireşä almıy. Törle kreditlar häm başqa yärdäm aqçaları qomğa señgän su kebek yuqqa çığa. Kiläse yıllarda däwlät bilendä awır taş bulıp tağılğan kolxozlarnıñ taralaçağın da farazlıy iqtisad belgeçläre. Kiläçäktä awıl xucalığı tarmağında waq eşquarlar häm fermerlarğa kübräk irek häm östenlek birergä kiräk digän fikeren Rusiä awıl xucalığı ministrı urınbasarı Sergey Mitin Ufada bügen ütkärgän kiñäşmäsendä dä äytte.

Bu könnärdä Başqortstanğa törle illärdän dä qunaqlar ber-ber artlı kilä. Misal öçen, Stärletamaq şähärenä Qazaxstannan zur ğına wäkillek kilep, älege köndä andağı ere şirkätlär eşçänlege belän tanışıp yöri häm üzara xezmättäşlek turında qayber kileşülär tözi.

Ä Ufağa bu könnärdä Yaponiä belän Qıtaydan kilgän wäkilleklär eş säfärendä yöri. Alar Ufanıñ Motor tözüçelär berläşmäsendä bulıp, andağı eşlär belän tanışa. Biredä bulğanda alar üzlärenä ike yaqlı xezmättäşlek başlaw öçen qızıqlı proyıqtlar da tapqan. Yaponiäneñ “Mitsubisi” häm Qıtaynıñ “Limin” dwiğätellär eşläw qorporatsiäse wäkilläre qayber täğayın eşlär buyınça kileşügä dä ireşkän digän xäbärlär bar.

XS
SM
MD
LG