Accessibility links

дүшәмбе, 5 декабрь 2016, Казан вакыты 11:37

“Sember” maltabarlar klubı qaharman şäxeskä yärdäm qulı suzdı


Ölkän buınnı Pawel Korçağin, Aleksey Mares'yev ürnägendä tärbiälärgä tırıştılar. Mares'yev ayağı tubıqtan kiselgän bulsa da, oçuçı sıyfatında frontta qaldırularına ireşä. Korçağin kürü häm yörü bäxetennän mäxrüm qalsa da, yäşäw öçen köç taba, kitaplar yaza. Yarıy äle, anıñ qulları eşli. Ä Ğakıyl' Säğirewneñ qulları da, ayaqları da xäräkätsez, utırıp ta tora almıy äle ul. Şulay da töşenkelekkä birelmi: icat aña yäşäw därte, yäşäw köçe birä. Şağir häm rässam teşlärenä qıstırılğan qäläm belän şiğer yaza, räsem yasıy. Läkin tağın ber afät östälergä tora: küzläre pärdälänä başlağan. Cäy başınnan birle räsemnär yasamıy, şiğerlären dä äytep kenä yazdıra. Tabiplar operatsiä kiräk, digännär. Läkin tülärgä aqçası yuq. Aña “Sember” isemle maltabarlar klubı yärdämgä kilde. Aqça tapşıru tantanasında oyışma räise Rawil Kuzäxmätev aña oluğ räxmäten dä belderde. Seberdä jurnalist bulıp eşlägän, ämma avariägä elägep, bötenläy yäşäw mäğnäsen yuğaltqan awıldaşına ul Ğakıyl' kitapların, anıñ turında “Çişmä” televizion tapşıruınıñ yazmasın büläk itkän. Häm bu yeget, çınlap ta, yäşäw yämen tapqan: elekke hönärenä qaytqan.

Çara aldınnan “Çişmä” tapşıruı redaktorı häm “Azatlıq” radiosı xäbärçese Ğakıyl' belän ğomum äñgämä qordılar. Süz uñayınnan ber küñelle xäbärne dä äytep ütärgä kiräkter. “Çişmä”bez xälläre beraz uñaylandı: anı şimbä kön kiçkä küçerdelär. Dimäk, tamaşaçısı sanı da arttı. 45 minutlıq tapşırunı 20 minutqa ğına qaldırğannar ide – xäzer 30 minut. Monı gubernator Sergey Morozov oyıştırğan “tügäräk östäl” näticäse dip farazlarğa da buladır.

Äñgämägä qaytsaq, “Çişmä” redaktorı Ramisnıñ ber sorawına ayıruça tuqtalıp ütü kiräkter: “Suğışlar, törle faciğalar arqasında invalidlar sanı üsä bara. Kübese yäşäw köçe taba almıyça, töşenkelekkä birelä. Alarğa nindi kiñäş birer ideñ?” Ğakıyl' fikerençä, monda kiñäş birüneñ faydası bik az bulır. İñ möhime – ixtıyar köçe, monnan da zur qıyınlıqlar bula, älegä monısına şöker, dip inanu: Häm kübräk uqırğa, tormış ağımı belän qızıqsınırğa. Mondıy bolğawır zamanda, minemçä, minnän dä nıq qähärlängän keşelär dä bardır bit dip, üzeñne yuatırğa tırışu kiräk. Bötenese – üzeñnän genä tora.

Äye, üzeñnän tora. Läkin cämğiätneñ mönäsäbäte dä tä'sir itäder inde. Uzğan tapşırularnıñ bersendä Ğaqilne Gonçarov isemendäge cirle premiägä täqdim itüläre häm bu ğözerneñ ütälmäwe turında xäbär bulğan ide. Säbäbe – tärcemäse naçar buluda. “Yaxşıraq tärcemäçe tabarğa tırışıp qaramadıñmı soñ? – digän sorawğa, şağir saylaw xoquqı birelmägänen äytte. İğänäçelär anı täqdim itkännär. Zur urın bilägän bu şäxes üzen yaxşı tärcemäçe, dip sanağandır inde, dip cawap birde.

Xäyer, şağir Gonçarov büläge birelmäwenä ällä ni poşınuın beldermäde. Ä menä Rezidä Qadıyrova kassetasında anıñ süzlärenä yazılğan cırnıñ köye häm süzläre R. Yegorovnıqı digänlegenä bik tä xätere qalğan.

Ayrat İbrahim, Sember

\

XS
SM
MD
LG