Accessibility links

якшәмбе, 4 декабрь 2016, Казан вакыты 13:15

Mäskäw şähär Duması saylawlarında liberal köçlär kommunistlardan da artta qaldı


Mäskäw şähär Dumasına uzğan saylawlarnı, kötelgänçä, Kreml qorğan "Yedinaya Rossiä" partiäse ottı - berençe näticälär şunı kürsätä - ul tawışlarnıñ yaqınça 46 protsentın qazanğan, şunnan soñ 17 protsent belän kommunistlar, ä öçençe bulıp 11 protsent belän berläşkän uñ köçlär kilä. Mäskäwdäge tawış birüne küplär Rusiädä 2007-nçe yılda uzaçaq Däwlät Duması saylawlarına äzerlek bularaq kürä.

Mäskäw şähär Duması saylawlarına bu yulı xalıqnıñ anda qatnaşu däräcäse bik tübän buluı xas ide. Tawış birügä saylawçılarnıñ barı tik 34 protsentı ğına kilgän. Moñardan berençe çiratta xakimiat yaqlı "Yedinaya Rossiä" partiäse otqan bulsa kiräk - şähär Dumasındağı 35 urınnıñ 28-en anıñ wäkilläre alaçaq. Kommunistlarğa 4, ä 10 protsentlıq kirtäne çaq qına uzğan berläşkän uñ köçlärgä 3 urın qala. Üzgärtep qoru çorınnan birle Rusiä başqalası demokratik wä liberal köçlärneñ töp nığıtması bulıp tordı. Ämma xäzer inde bu da üzgärde sıman - şähär Duması saylawlarına uñ köçlär zurraq ömetlär bağlağan ide. Yaqlawnıñ tübän buluın alar üzlärençä añlata, "Yabloko"nıñ räis urınbasarı Sergey Mitroxin:

"Bez şundıy näticägä kildek ki, Mäskäw saylawları barışındağı xärämläşü älegä qädär ber genä şähärdä dä kürelmägän däräcädä buldı. Alay ğına da tügel, bu açıqtan-açıq, oyatsız räweştä eşlände. "Yabloko" häm Rusiäneñ berläşkän demokratlarına qarşı maqsatçan kampaniä alıp barıldı häm moña asılda Kremldän citäkçelek itelde. Şuña nigezlänep bez xäzer şuşı eş saylaw bülgelärendä başqa çaralar yardämendä dä däwam ittereläçäk dipuylıybız", dip zarlana "Yabloko" räiseneñ urınbasarı Mitroxin.

Mäskäw şähäreneñ saylaw komissiäse başlığı Valentin Gorbunov bu ğäyepläwlärne kire qağa häm tawış birü barışında da, tawışlarnı sanağanda da citdi bozular bulmadı, dip belderä. Küzätüçelär, Mäskäw şähär Dumasına saylawlar, bar Rusiädä 2007-nçe yılda uzaçaq parlament saylawlarınıñ üzenä kürä ber "general repetitsiäse" bulıp tora dip isäpli. Ägär dä bu şulay ikän, xäzerge näticälär liberal köçlärne bu yulı da yaqtı kiläçäk kötmäwen kürsätä.

Mäskäwdä alar Kreml qorğan kirtälär belän genä tügel, ä şähärneñ küptänge xakime Yuri Lujkov abruyına qarşı da köräş alıp bardı. Töp ciñüçe - "Yedinaya Rossiä" isemlegen näq menä ul citäklägän ide. Ämma demokratlarnı bigräk tä Lujkovqa ottıru tügel, ä Mäskäwdä inde onıtıla başlağan kommunistlardan da artta qalu ğärländerä. Sergey Mitroxin fikerençä, kompartiäneñ liberallarğa qarağanda kübräk tawış qazanuına xakimiatneñ saylawlardan yamanatı taralğan "Rodina" firkasen töşerep qaldıruı säbäp bulıp tora. Anıñ tarafdarları bu yulı üz tawışların kommunistlar öçen birgän dip farazlana. Ä menä kompartiä citäkçese Gennadi Züganov monıñ belän kileşmi:

"Mäskäwdä dä, bar ildä dä saylawçılar xäzer bezneñ alar mänfäğäten äwzem yaqlawıbıznı, toraq xucalığındağı bäyälärneñ üsüenä qarşı toruıbıznı, sovet xakimiaten, sovet idealların, Qızıl mäydannı yaqlawıbıznı kürde. Bez xäzerge çorda xezmät iäläre mänfäğäten qayğırtqan köç bulıp torabız", dip belderä Gennadi Züganov.

Saylawlarda qatnaşu däräcäseneñ tübän buluı ğädättä kommunistlar öçen faydağa kitüe bilgele bulsa da - mäğlüm ki, alarnıñ olı yäştäge tarafdarları tawış birügä oyışqan töstä yöri, - bu demokratlarnıñ Mäskäw şähär saylawlarında tübän näticägä ireşüenä berdänber säbäp bula almıy.

Kärim Kamal
XS
SM
MD
LG