Accessibility links

якшәмбе, 11 декабрь 2016, Казан вакыты 03:33

Berniçä buın jurnalistlarnı tärbiälägän Florid Ägzamov wafat buldı


Tapşırunı qayğılı xäbär belän däwam itärgä mäcbürbez. 4 dekaber könne Qazan däwlät universitetı jurnalistika fakul'tetınıñ elekkege citäkçese, tanılğan ğalim, kürenekle şäxes Florid Ägzämov wafat buldı.

Florid äfände tatar zıyalıları arasında bilgele häm alıştırğısız şäxes. Ğalim Qazan däwlät universitetınıñ 25 yıl däwamında jurnalistika häm sotsiologiä fakul'tetın citäkläde. Şul arada Florid Ägzamov Tatarstanğa häm İdel buyı töbäklärenä yözlärçä belgeç uqıtıp çığara. Häm anıñ tırışlığı belän 90 yıllar başında milli kadrlar äzerläw yünäleşendä bik küp eşlär başqarılğan. Äytik, tatar jurnalistikası bülege dä barı tik Florid Äxmät ulı tırışlığı näticäsendä buldırılğan ide. Berniçä buın jurnalistlarnı tärbiälägän Florid Ägzamovqa 2004 yılda jurnalistlarnıñ Bällür qäläm konkursında iñ yaxşı jurnalist iseme birelde. Jyuri äğzaları da ber tawıştan iñ olı büläk – maşinanı Florid äfändegä tapşırırğa buldı. Älege olı ğalim turında Jurnalistika häm sotsiologiä fakul'tetınıñ xäzerge dekanı Wasil Ğarifullin fikere:

“Florid ağa tatar jurnalistikasınıñ tarixın, teoriäsen öyränü mäs’äläläre belän bik aktiv şöğellände häm ğalimnärne dä şuña tupladı. Üze dä bik küp kitaplar, xezmätlär yazdı. Äytik, anıñ “Tuqay – jurnalist” digän monografiäse ğalimnär, belgeçlär arasında zur qızıqsınu uyattı. Ul inde soñğı yıllarda da Tuqay ensiklopediäsen tözügä bik zur öleş kertte. Ul üze dä ensiklopedik ğalim bularaq häm ğalim, yaxşı, yaqtı küñelle keşe bularaq anıñ istälege bik küp buın jurnalistlar xäterendä mäñge saqlanaçaq. Bez inde anıñ şäkertläre bik küp töbäklärdä eşläwçe jurnalistlar, redaktorlar, xäbärçelär, ğalimnär häm bügenge studentlar yaqtı istälegenä tuğrı bulıp qalırbız digän ışanıçta qalam”.

Anıñ fänni eşläre matbuğatta gumanizm prinsipları belän bäyle, Florid äfände üze dä tormışta bik keşelekle şäxes bulğan. Jurnalistika fakul'tetınıñ xäzerge studentları Florid Ägzamov turında:

Rail: “Minemçä, Florid abıy kebek jurnalistikağa ayıq qaraşı bulğan uqıtuçı yuqtır da inde bezneñ fakul'tetta. Jurnalistika fakul'tetın Florid abıydan başqa küz aldına kiterüe älbättä awır. Häm älege yuğaltuğa bik ozaq waqıt iäläşergä turı kiläçäk”.

Sömbel: “Bez menä tatar jurnalistikası ğına tügel, ä ğomumän jurnalistikanıñ ätisen yuğalttıq. Çınnan da bu bezneñ öçen bik awır. Min xäzer dürtençe kursta uıqim, ä minem berençe kursta Florid abıy däresennän birgän imtixanım küz aldımnan kitmi. Ul bezneñ küñelebezdä barı tik yaxşı keşe bulıp qına xäterdä qalaçaq”.

Äbilä: “Min anı kübräk keşe bularaq yarattım. Çönki döresen genä äytkändä, miña anıñ däreslärendä utıruı bik qızıq bulmadı. Bez bit inde yäşlär häm bezgä kübräk bügenge kön turında işetäsebez kilä. Ä ul üzeneñ däreslärendä bezgä yışraq KPSS digän süzlär qabatlıy ide”.

Märxüm belän xuşlaşu 6 dekaber könne uzaçaq.

Gölnaz Şäyxetdin

XS
SM
MD
LG