Accessibility links

Кайнар хәбәр

Qazannıñ tağın ber citäkçese bulaçaq


Qazannıñ başqarma komitet başlığı itep, ber tawıştan İlsur Metşin saylandı. Ütkän şimbädä, şähär Dumasınıñ utırışı buldı. Anda deputatlar, 2 nämzättän bersen, Metşinnnı sayladı. Bu xäbärne işetkän qazanlılar, aptıraşta qaldı. Çönki küplär, munisipal reformanıñ asılın añlamıy bulıp çıqtı. İlsur Metşinnı, Prezident ber tapqır üzeneñ qararı belän bu urınğa bilgeläde bit inde, nigä tağın saylawlar ütkärü kiräk buldı digän sorawlarnı işetergä turı kilä. Tatarstan başqalasında, xäzer, 2 törle xakimiät ğämäldä. Qazan şähär idäräse häm anıñ deputatlar şurası wäqäläte 2005 yıl axırında betäçäk. Anıñ urınına munispal xakimiät kiläçäk. Xäzer – küçeş çorı bara. Şuña kürä, idärä itü oyışmalarnıñ ike törlese eşläp kilä. İkençese tör xakimiät, munisipal oyışmalar, äle oyışıp qına kilä. Munisipal berämlek deputatlar cıyılışı 16 üktäberdä saylandı. Alar arasınnan, munisipal berämlek başlığı barlıqqa kilde. Xäzer şuşı munisipal xakimiätneñ başqarma komitetı da oyışa başladı. Kamil İsxakovnıñ Yıraq könçığışqa kitüe bilgele bulğançığa qädär, elekke Qazan şähär idäräse başlığı urınında da, munisipal berämlek başlığı urınında da, ul üze utıra ide. Elekke Qazan şähär idäräse başlığı urınına İlsur Metşinnı Prezident bilgeläde. Ämma anıñ wäqälätläre yaña yıl tönendä ğämäldän çığaçaq ide. Çönki berençe ğinwardan, munisipal xakimiätneñ waqıtı citä. Munisipal berämlek idäräse başlığı urınına ütkärelgän bäygedä İlsur Metşin da qatnaştı. Bäyge turında, ütkän tapşıruıbızda söyläğän idek. Anda 8 keşe yarıştı. Şulardan, 2 keşe saylap alındı, ä şimbä könne, yaña munisipal berämlek deputatları, 2 keşeneñ bersen, İlsur Metşinnı, ber tawıştan saylap quydı. Ämma şul uq waqıtta, munisipal berämlek başlığı itep, Kamil İsxaqov qaldı. Çönki, qanunda başqarma komitet başlığı ber närsä, munispal berämlek başlığı bötenläy başqa närsä, dip bilgelängän. Başlıq, mer – ul cawaplı keşe, ämma çınlıqta, xäl itü xoquqı, başqarma komitet citäkçesendä bulaçaq. Kamil İsqakov, Vahapov okrugında saylanğan deputat häm munisipal berämlek başlığı wazifalarınnan 16 dekaberdä qaytqanda baş tartam, dip belderde. Dimäk, Qazannıñ merı, digän tağın ber citäkçe bulaçaq. Başlıq ta, başqarma komitet citäkçese dä, ber uk keşe bula almıy ikän. Qanun röxsät itmi. Bu xaqta ul, yäkşämbe könne, «Yaña ğasır» kanalınıñ analitik tapşıruında da xäbär itte.

Munisipal berämlek deputatları cıyını, kiläçäktä, Şähär Duması dip atalırğa mömkin. Bu süz, torğan sayın nığraq qullanışqa kerep bara. Elekke şähär xakimiätlärenä qarağan sotsial, mädäniät, sälämätlek häm başqa yünäleştäge büleklärne dä, üzgärtep qorular kötä. Alar, atamaların ğına tügel, eşlägän belgeçlär yağınnan da yañarırğa mömkin. Şähär belän idärä itügä kilgän İlsur Metşin, iñ berençe eş itep, başlıqnıñ urınbasarın alıştırdı. Soñınnan, apparat citäkçese urınına yaña keşe kilde. Küptän tügel, finans idärä citäkçese itep 24 yäşlek, London finans mäktäben betergän, yeğet raslandı. İlsur Metşinnıñ berençe belderülärneñ berse, xosusi avtobuslarğa marşrutlar bülü turında ide. Bu ölkädä tuğan xälne cayğa salaçaqmın, dide ul. Agentlıqlar xäbär itelgänçä, avtobuslarnıñ eşe şundıy itep tärtipkä salınğan ki, xosusi avtobus xucaları bayı, ä cämäğät transportı zur zıyan kiçerä. Älege belderülärdän soñ, analitiklar, bu biznesta yuğaltular, rişwätçelek skandalları kilep çığu, qırıs çaralar kürelü mömkin, dip sanıy.

Bikä Timerova.

XS
SM
MD
LG