Accessibility links

пәнҗешәмбе, 8 декабрь 2016, Казан вакыты 07:07

Pasportta Tatarstan bitläre zıyanlımı?


Üz isemen äytergä telämägän ber keşe “Weçerka” gäzitendä bolay dip yaza. “Däwlät Şurası citäkçeläre häm deputatlar, räxmät sezgä. Pasporttağı Tatarstan vkladışı - östämä bitläre yärdäme belän mine Mäskäw ölkäsendä berniçä säğätkä kamerağa yaptılar. Häm şäxesne raslağançığa qädär çığarmadılar. Ä annarı kit monnan diep artıma tiptelär”. Respublikadan çitkä çığuçı qayber tatarstanlılarnıñ mondıy problemaları xaqında elek tä işetergä turı kilde.

Zamanında sovet pasportların Rusiä pasportlarına alıştıru bulğanda, Tatarstan vkladışları yäğni östämä bitle pasportlar respublikağa kübräk kiterelgän. Ämma pasport belän bäyle bäxäslär kilep tuğaç, qayber keşelär älege östämä bitlärdän waz kiçkän. Ni disäñ dä bezdä bu vkladışnı alu yäki almaw xoquqı birelgän. Näticädä, Tatarstanda Rusiä pasportların aluçılar sanı artqan. Rusiä pasportlarına xätta qıtlıq ta bulğan.

Älege mäs'älä buyınça “Azatlıq” xäbärçese xalıqqa da möräcäğät itte. Respublikadan çitkä çıqqaç, Tatarstan vkladışı belän bäyle problemalar küzätelgänme alarda? Bügenge açıq mikrofon şuşı xaqta

- Başqa şähärlärgä barıp yörim, ämma ber dä problemalar bulmadı.

- Min pasportnı äle küptän tügel aldım. Miña andıy vkladış ğomumän birelmäde.

- Küptän tügel Mäskäwgä barıp qayttım. Küp kenä şähärlärgä tuqtadıq, ekskursiälärgä bardıq. Alay ber keşe dä bäylänmäde, qızıqsınmadı.

- Miña pasport birgändä äyttelär, ul östämä bitlärne almaw xäyerleräk, çönki başqa şähärlärgä barğanda qıyınlıqlar tuarğa mömkin.

- Andıy problemalarım bulmadı, allağa şöker, yörim äle şuşı pasport belän.

Şulay da Mäskäw häm başqa şähär-respublikalarda tatarstanlılar pasportı belän bäyle bäxäslär nigezleme? Respublikanıñ pasport-viza xezmätkärläre äytüençä, pasporttağı Tatarstan vkladışları - östämä bitläre Rusiä häm respublikanıñ qararlarına nigezlängän. Qanunnarnı täñgälläşterü barsa da, älege mäs'älä üz köçendä qala. Şunlıqtan tatarstanlılar pasportına ber kem dä bäylänergä tieş tügel, alarnıñ moña xoquqı yuq, dip äytte pasport-viza xezmätkärläre.

Al'bina Zäynulla

XS
SM
MD
LG