Accessibility links

шимбә, 3 декабрь 2016, Казан вакыты 18:43

Rusiä möselmannarı Rusiä tuğrasınnan xristian tamğaların alırğa çaqıra


Rusiäneñ Aziä öleşe Diniä nazaräteneñ baş möftie Rusiä tuğrasınnan xristian dine tamğaların alırğa çaqırdı. Näfiğulla Aşirov süzlärençä andağı tärelär häm izge Georgi süräte Rusiä möselmannarınıñ xislären räncetä, däwlätneñ dönyawi buluına qarşı kilä. Möselman ruxaniları pravoslav çirkäwneñ däwlät eşlärenä torğan sayın nığraq yoğıntı yasawına borçılu belderä.

Rusiä tuğrası mäsäläsen başlap Tatarstan möselmannarı kütärep çıqtı. Küptän tügel alar xristian tamğaları töşerelgän Rusiä pasportı yörtergä mäcbür bulularına rizasızlıq belderde. 1993 yılda qabul itelgän Rusiä tuğrasında ike başlı börketneñ taclarında tärelär töşerelgän, östäwenä, atqa utırğan izge Georginıñ söñge belän acdahağa qadağan süräte urnaştırılğan.

Seber möftie Nafiğulla Aşirov fikerençä, üzen dönyawi däwlät dip atağan ildä mondıy tuğra bulırğa tieş tügel. Häm dä eş tuğrada ğına tügel. 20 million möselman yäşägän Rusiädä xristian dineneñ tormışnıñ här tarmağına torğan sayın nığraq ütep kerüe möselmannarda borçılu uyata.

"Tuğradan tış başqa mäsälälär dä bar. Federal yullarda 20 metrlı tärelär utırtalar. Su astı köymälären öşkerälär. İnde ğälämgä ikonalar cibärä başladılar. Minemçä, bu cämğiätneñ açuın çığara", di Nafiğulla Aşirov.

Tuğrağa kilgändä, Rusiä prezidentı qarşındağı Heraldiä şurası räise Georgi Vilinbaxov bu ğäyepläwlärne kire qaqtı. Anıñ süzlärençä, tuğradağı caydaq izge Georgi tügel, anıñ baş östendä nurlı alqası yuq. 4 çatlı täreneñ dä nindi dä bulsa berär din belän bäyläneşe yuq. Andıy tärelär törle illärneñ tuğra-bayraqlarında bar.

Rusiäneñ keşe xoquqları xäräkäte citäkçese Lev Ponomarev mondıy añlatma belän kileşmi, ul Aşirovnıñ täqdimen xuplıy. "Minemçä bu urınlı täqdim. Bez dä, başqa xoquq yaqlaw oyışmaları da däwlätneñ dönyawilığın saqlap qalırğa tırışa. Bez gimn tekstına, andağı "bog" süzenä dä qarşı çıqtıq. Añlaşıla ki, mondıy täqdimnär Rusiädä pravoslav xäräkäte radikalläşkän sürättä yasala", di Lev Ponomarev.

Möselman citäkçeläre süzlärençä, däwlät simvolların alıştıru taläbe belän alar Rusiädä möselmannarğa qarata mönäsäbätneñ naçarlana baruına iğtibar cälep itergä teli. Rusiäneñ İslam komitetı räise Xäydär Camal süzlärençä, "Bügen möselmannar üzlären kolonial patşa imperiäsendä kebek, ikençel keşe itep xis itä. Alarnı törle cinäytälärdä ğäyeplilär, terorçılıq, wahabiçılıqta ğäyepläp qulğa alalar, cäzalıylar. Älbättä bu mäsälälär tuğradan möximräk. Läkin bar närsä keşkenädän başlana."

Möselman ruxaniları älegä bu başlanğıçqa törleçä mönäsäbät belderä. Äytik, Kareliä häm Nijgar möftiläre, Ali Visam Bardawil häm Damir Möxetdinov Rusiä tuğrasın üzgärtü täqdimen xuplap çıqtılar. Ä menä Rusiäneñ Verxovnıy möftie Tälğat Tacetdin häm Rusiäneñ Möftilär şurası räise Rawil Ğäynetdin bu yulı urtaq fiker belderep, Rusiä tuğrasın üzgärtü täqdimen xuplamadılar.

ali gilmi
XS
SM
MD
LG