Mäkkädä ütä torğan Dönya İslam konferensiäse oyışmasınıñ qorıltayında Kamil İsxaqov citäkçelegendäge Rusiä deleğatsiäse dä qatnaşa. Elekke Qazan başlığı, Kamil İsxaqovqa Rusiä isemnän bara torğan törkemne üzenä formalaştıru xoquqı birelgän bulğan. 10 keşeneñ berse itep ul Tatarstan möftie Gösman İsxaqovnı da çaqırğan. Mäkkädäge islam illäre konferensiäsendä islam ara xezmättäşlek mäsälläre tikşerelergä tieş. Ä şul arada, Tatarstan möselmannarınıñ ber öleşe Mäkkägä xacğa barırğa cıyına. Mäkkädä säfärlär oyıştıru belän şöğellänüçe «İdel – Xac» şirkätendä eş qaynıy. Şuña äzerlek çaraları da, küp waqıt taläp itä. Suriä häm Gäräpstan ilçelekläre belän söyläşülär bara, ber niçä il aşa uzarğa tieşle säfärçelärgä vizalar alına. Bıyıl, säfärgä avtobus belän baruçılar berniçä tapqırğa kübräk buluı, oyıştıruçılar öçen yañalıq bulğan. Mäsälän, şirkätneñ xezmätkäre Aygöl Fäyzieva äytkänçä, 2 avtobus urınına bişne yulğa äzerlägännär. Monı avtobus yullamasınıñ arzanraq buluı belän genä tügel, ä yulnıñ qızığraq häm ğazaplıraq buluı belän añlatıp bula, di şirkätneñ xezmätkäre Ayğel tutaş. Säfärçelär, ber atna buyı yulda bulalar häm täräzädän ber niçä il aşa uzalar. Avtobus Tatarstan, Äzerbäycan, İran, Suriä, Törkiä, İordaniä aşa Ğäräbstanğa kilep citä.
Bıyl 600läp ğariza qabul itelgän, alarnıñ ber öleşe avtobus belän bara, qalğannarı oçqıç belän oça. Kemnär alar xacilar digän sorawğa, şirkätkä, dokumentların döreslärgä kilgän ber abzıyğa qarap çamalap bula ide. Ul xacğa barır aldınnan şaqtıy dulqınlanğan. «Azatlıq» xäbärçese belän söyläşkändä, küzläre yäşlände. Äzhär abıy, 3 yıl äzerlänüen, aqçalar cıyuın, aqçalar eşläwen, niätläp baruın äytte.
Xacğa baruçılarnıñ berençe törkeme, avtobuslılar, 20 dekaber könne, Qazannan çığıp kitä. 40 meñlek yullamadan tış, alarğa yulda aşaw häm qorban çalu bäyäsen östämä tülärgä turı kiläçäk. 28 dekaber tirälärendä, oçqıç häm öleşçä avtobus belän baruçılar Qazan ayeroportınnan yulğa çığarğa äzerlänep tora. Ä, Mäskäw häm Misırnıñ ber şähäre aşa Djidağa oçuçılar, ğinwar başında ğına yulğa çığa. Oçqıç belän xacğa baru, säfärläreneñ iñ qıybatı sanalsa da, säfärlär oyıştıru belän şöğellänüçelär, oçqıçta urınnar az qaldı, dip belderä.
Bikä Timerova.
