Accessibility links

Кайнар хәбәр

Tömänlelär “Bäyräm” diskotekasın bik yarata


“Awıldan kilgän tatar yäşläreneñ küñele kiptergeç käğäz kebek”,- di Liliä Kärimova. Liliä “Bäyräm” diskotekasın oyıştıruçılarnıñ berse. Awıl öçen zur tärtipsezlek bulğan küreneşlär: şähär uramında, baqçalarda cıyılışıp sıra eçep utıru, äxlaqsızlıq yäş küñelne xäzer üzenä suırıp alırğa mömkin. Annan da qala, xälle genä ğailädän kilgän yäşüsmer şähär iqtisatında üzen näwmiz itep toyıp kimsenä başlıy. Ös-baş kieme dä 250-300 sum tüläp kerä torğan diskotekalarğa yörüçelärneke belän yarışa almıy. Sanıy kitsäñ, tatar yäşläre aldına bügenge tormış ällä ni qädär kirtä, sınawların quyarğa mömkin.

Uzğan yıl Tömän şähärendäge “Karavella” kafesında yäşlär öçen tatarça diskotekalar ütkärelgän ide. Bütän barır urınnarı bulmağan yegetlär-qızlar bu çaradan bik ük qänäğät bulmağannarın da äytkälädelär. Tömän yanındağı tatar awılları yäşläre arasında nizağ çişü, urısça äytsäk “strelka” urını ikänlege xalıq arasına tiz taraldı. Utsız töten bulmıy digän kebek, “Karavella” nıñ tötene böten şähärgä tiz taraldı. Cäyge yallardan soñ Tömändäge ber genä mädäniät yortı da, ber genä kafe da tatar yäşlären üzendä bietergä telämäde.

Tuylar, törle mäcleslär ütä torğan “Şahzadä” tantanalar yortı xucaların ügetläw häm ütkäreläçäk çaranıñ bötenläy başqa yunäleştä bulaçağın añlatu da oyıştıruçılardan zur tüzemlelek sorağan...

Min “Bäyräm” diskotekasında bulğan könne Tömän tatarlarına ğına tügel, mädäniät ähellärenä dä yaxşı tanış xalıq uyın qorallarında uynawçı Äbüzär Minnebaev bu çaranıñ qunağı ide. Äbüzärne urıslar “Çelovek-orkestr” dip yörtälär. Yäşlär aldına çığıp ul quray, qubız, sornay, keçkenä garmunnarda uynap kürsätte. Tal'yanğa biette. Yäşlär awızların açıp tıñladılar. Baqsañ, diskotekağa cıyılğan 200 läp keşeneñ berse dä quray belän qubıznı ğına tügel tal'yannıñ isemen dä belmi ikän... Diskotekanı oyıştıruçılar ike teldä alıp baralar. Bälki ber yıldan soñ saf tatar telenä dä küçergä mömkin bulır dip ömetlänälär.

Tömän şähärendä “Bäyräm” diskotekası öç tapqır ütte inde. Här çarağa qunaq çaqırıla. Berençesendä Rusiäneñ ğädättän tış xällär ministrlığınıñ Ural-İdel töbägendäge iñ çibär qızı Miläwşä İbrahimova, ikençesendä milli uyın qoralları ostası Äbüzär Minnebaev belän tanıştılar. Öçençesendä “Äxtämüşki” ansamble cırların tıñladılar. Här diskotekağa yäşlär arasınnan yaña cırçı kilä.

Nail Alan. Tömän.

XS
SM
MD
LG