Başqortstannıñ yaña prokurorı itep moñarçı Rusiäneñ Ul'yan ölkäse prokurorınıñ urınbasarı bulıp eşlägän Sergey Xurtin bilgelänergä mömkin. Rusiäneñ general' prokurorı Vladimir Ustinov näq menä anı Başqortstan prokurorı itep raslawnı sorap, Başqortstan Däwlät Cıyılışı-Qorıltayğa möräcäğät itkän.
Mäğlüm buluınça, ber ay çaması elek Başqortstannıñ elekke prokurorı Aleksandr Konovalov Rusiä Prezidentınıñ İdel buyı federal' okrugındamı tulı wäqälätle wäkile itep täğäyenlände. Şunnan birle Başqortstan prokurorı wazifaların anıñ urınbasarı Salawat Kärimov ütäp tordı. Qayber säyäsätçelär näq menä anı yaña prokuror itep bilgeläyäçäklär, dip farazlağan ide. Ni öçen digändä, ber yıl çaması elek kenä Mäskäwdän qaytqan, añarçı Rusiä general' prokuraturasında eşläp, baytaq qına şaw-şulı eşlärne açqan Salawat Kärimov bu urınğa bik qulay bulır kebek ide. Ämma bu yulı isäp xisapqa turı kilmäde.
Ul'yan ölkäse prokurorı urınbasarı Sergey Xurtinga 45 yäş. Şul wazifağa ul ber yıl elek kenä täğäyenlängän bulğan. Xäzer inde menä Başqortstan kebek zur respublikada prokuror wazifaların ütäyäçäk ul. Sergey Xurtinnıñ kandidaturasın Başqortstan Däwlät Cıyılışı deputatları üzläreneñ bıyılğı soñğı utırışında, 22 dekaberdä tikşeräçäk. Anıñ raslanaçağına berkem dä şik beldermi. Östä bu mäs'älä tulısınça xäl itelgänder inde, dip belderä säyäsät belgeçläre, ä Başqortstannıñ kündäm deputatlarına Sergey Xurtinnı bertawıştan xuplıysı ğına qala. Başqortstan parlamentındağı üz fikerle deputat Gennadi Şabaev respublikanıñ yaña prokurorınıñ çittän kiterelüen ber yaqtan uñay bäyäli, läkin anıñ da tiz genä arada Başqortstan räsmi xakimiätläreneñ qubızına bii başlayaçağına şiklänmäwen äytä.
Fänis Fätxi, Ufa
