Accessibility links

Ğiraqta saylaw aldı kampaniäse bara. Köçäytelgän iminlek çaraları küreläçäk


"Sezneñ tawış qäderle" digän şiğärlär belän Ğiraq televideniese kiläse atna ütäçäk parlament saylawlarına saylawçılarnı cälep itergä tırışa. Kiläse atnakiçtä Ğiraq xalqı, Saddam bärep töşerelgännän soñ berençe tapqır 4 yıl möddätle Mäcles saylıy. Saylaw aldı kampaniäse nigezdä televideniedä bara, läkin anda ğına tügel.

Qırıs iminlek çaralarına qaramastan, qayber säyäsmännär şaqtıy zur uram cıyınnarı oyıştıra. Tanılğan şiği citäkçe Äbdel Aziz Äl-Xakim Qarbalada meñlägän tarafadarın cıya aldı. Bağdadta premier-ministr Ayad Allawinı xuplaw cıyınnarı ütte.

Ğiraqnıñ bäysez saylaw komissiäse räise Ğädel äl-Lami söyli: "Saylaw aldı kompaniäsendä dini tamğalar qullanu, yä isä berär dini yä etnik törkemne kimsetkän tamğalarnı qullanu tıyılğan. Bu taläpne här säyäsi firqä ütärgä tieş bulaçaq." Äbdel Aziz Äl-Xakim süzlärençä, tärtip bozular turında firqälär komissiägä xäbär itergä tieş. Älegä nindi dä bulsa citdi şikäyätlär kilmägän.

Sişämbedä, saylawlarğa 2 kön qala, xökümät köçäytelgän iminlek çaraları kertergä cıyına. Hawa alannarı, çiklär yabılaçaq, komendant säğätläre kerteläçäk, vilayät çiklären ütü tıyılğan bulaçaq. Bu çaralar şimbä irtäsenä qädär ğämäldä bulaçaq.

Ğinwar ayında ütkän waqıtlı parlament saylawlarına sönnilär baykot beldergän ide. Belgeçlär fikerençä, bu yulı alarnıñ kübese qatnaşırğa mömkin. Ber yaqtan nazmätlär isemlege ozın. İkençe yaqtan, amerikan ğäskärlären çığara başlaw turında süzlär yöri, dimäk 4 yılğa saylanaçaq Mäclesneñ wäkälätläre bermä-ber arta digän süz. Bu da saylawlarğa küpmeder mäğnä östi.

ali gilmi
XS
SM
MD
LG