Tatar Kongressınıñ Başqarma komitetı utırışında tikşerelgän ikençe mäs’älä, «Tatar ğailäse» programması ide. Millätne saqlaw mäs’äläsen, tatar cämäğätçelege, ir-atlarnıñ abruyın kütärü, ürnäk ğailälärne propagandalaw, tatar yäşlären tanıştıru üzäklären oyıştıru aşa xäl itmäkçe. Bötendönya Tatar Kongressı Başqarma komitet başlığı Rinat Zakirov, könneñ ikençe yartısında başlanğan utırışta «Tatar ğailäse» digän programma belän tanışırğa täqdim itte. Andıy programmanıñ eşläwe zaman taläbe, dielde anda. Bu mäs’älä turında Tatarstan xökümäte qarşındağı grajdannarnıñ xälen terkäw bülege başlığı İldus Ämirxan çığış yasadı. Anıñ äytüenä qarağanda, älege programma 1996 yılda qabul itelgän «Tatar ğailäseneñ äxlaqi kodeksı» nigezendä eşlängän, anı yañartu cähätennän tözelgän. «Tatar ğailäse» mäs’äläse, tatar xatın-qızlar oyışmasın nıq borçığan problemalarnıñ berse. Şuña bu xaqta, «Aq qalfaq» oyışması başlığı Kämäriä Xämidullina çığış yasadı. Ul balalar belän eşläw täcribäsennän alınğan täcribä belän tanıştırdı, tulı bulmağan ğailälärdä balalarnıñ uy-kiçereşläre belän tanıştırdı. «Söyembikä» jurnalı baş möxärrire Firaya Bädertdinova ir-atlarnıñ abruyın kütärergä kiräk xäzer, alarda mäğlümat çaraları aşa cawaplılıq tärbiälärgä çaqırdı.
Kongress räiseneñ çığışında, Penza ölkäse Urta Äläzän awılı täcribäse uña dip misal itep kiterelgän ide. Äläzän keşe, avtonomiä räise Qazim Deberdiev ul täcribä turında söyläde. Anıñ añlatuınça, Äläzändä, näseleneñ iñ abruylı keşeläre cıyıla, qıznıñ näselen tikşerä, yıraq tuğanlıq yuqmı, näseldä tärtipsez keşelär yuqmı, awırular yuqmı häm başqa yaqlardan. Başqoda bilgelänä, ul yawçı bulıp ikençe ğailägä bara, anda da, qarşı yaq näselen tikşerälär, möhär külämen bilgelilär, başta, nikax uqıla, mähär tülänä, annan soñ tuy ütkärelä. Cämäğätçelek wäkilläre tarafınnan täqdim itelä torğan «Tatar ğailäse» programması qısalarında ütälergä tieşle çaralar isemlege dä täqdim itelde. Anda mäsälän, tatar ğailäse tärbiäse mäsäläsen öyränüçe fänni instut buldıru, konferensiä ütkärergä, yawçılıq xezmätlären açırğa, ürnäk ğailälär bäygesen uzdırırğa, yaña tözelgän tatar ğailäläreneñ häm yaña tuğan balalarınıñ mäğlümati komputer bankın buldırırğa dielgän. Başqarma komitet utırışında, şulay uq, tatar ictimaği yışma citäkçelärenä, aktivistlarına 1000 yıllıqqa bağışlanğan medal’lär tapşıru buldı. Medal aluçılar arasında, Penza, Samara, Sarıtaw, Çiläbe,Kirov ölkäläre, Mari El respublikası tatar cämäğätçelek wäkillärenä, Äzerbäycan, Ukraina häm Qırğızstandağı tatar cämäğätçelek wäkilläre dä medal’lär aldı.
Bikä Timerova
