Accessibility links

пәнҗешәмбе, 8 декабрь 2016, Казан вакыты 15:00

Rusiä Ukraina öçen tabiği gaz bäyälären nıq arttıra


Rusiäneñ däwlät qaramağındağı Gazprom şirkäte kiläse yıldan Urkaina öçen tabiği gaz bäyälären nıq kütäräcägen iğlan itte. Gazpromnıñ şura räise urınbasarı Aleksandr Medvedev bügen televidenie aşa kürsätelgän belderüendä Gazprom Ukrainağa gaznı Yewropa bäyäsennän sataçaq dide. Kiläse yılda meñ kubometr tabiği gaz bäyäse 220-230 dollar bulır dip kötelä. Elegräk Rusiä Ukrainadan kiläse yılda meñ kubometr gaz öçen 160 dollar alaçağın beldergän ide. Xäzergä isä Rusiä Ukrainağa gaznıñ meñ kubometrın 50 dollardan sata. Medvedev bazar şartları üzgärü säbäple Rusiä xäzer Ukraina öçen küpkä yuğarıra bäyälär quyarğa tieş dide. Ul Kievnı gaz söyläşülären qatlawlandırırğa gäm suzarğa mataşuda ğäyepläde. "Ukraina söyläşü protsessında waqıt suzdı häm bügen inde bez 160 dollar turında süz alıp bara almıybız. Bazar şartları üzgärde häm ul daimi üzgärep tora. Şuña kürä bez Rusiä-Ukraina çigendä bäyälärne Yewropa bäyälärenä qarap quyu turında ğına süz alıp bara alabız. Älbättä gaznı Ukrainağa qudıru çığımnarı isäpkä alınaçaq" dide Medvedev. Kiçä Gazprom ägär dä yıl axırına qädär kileşügä ireşelmäsä Ukrainağa gaz cibärüne tuqtatu mömkinlegen belderde.

XS
SM
MD
LG