18 dekaber könne xalıqara migrantlar köne bilgeläp ütelä. Migratsiä xezmäte wäkilläre, çittän kilüçelär temasına cämäğätçelekneñ iğtibarın yünältergä teläp, jurnalistlar belän matbuğat oçraşuın uzdırdı. Anda migrantlar turında yaña mäğlümatlar yañğıratıldı.
Qazannıñ 1000 yıllığı, bu xezmätkä dä nıq tä’sir itkän, 2005 yılda, ütkän yıl belän çağıştırğanda 2 tapqırğa kübräk migrant quyılğan.
Tatarstanda räsmi terkälgän çit il watandaşlarınıñ sanı 60 meñ tiräse dip isäplänä. Bigräktä, respublikanı Üzbäkstan watandaşları üz itä, alar kilüçelärneñ 43% täşkil itä, annan soñ Tajikstan häm Äzerbayjannan da küp kilälär. Aralarında tatarlar da bar dilär. Yaxşıraq tormış ezläp kilgän keşelärneñ barısı da, räsmi eş röxsäte belän kilep urnaşmawın, migratsiä xezmäte wäkilläre üzläre dä tanıy. Ämma qanunnı ütäwçelär sanı arta bara, dilär alar. Mäsälän, migratsiä eşläre idäräse başlığı Nikolay Vladimirovnıñ äytenä qarağanda, bıyıl 829 eş birüçe, 13 meñläp eşçegä monda kilep eşlärgä, räsmi röxsät sorap möräcäğät itkän. Andıy eş birüçe bulsa, ul çittän çaqırtqan eşçelärneñ qayğırtıp yäşärgä tieş bulsa, monda yäşäw röxsäte mötdäte betsä, üze ozayta mäsälän. Andıy eş birüçeläre bulmağan keşelär röxsätsez eşläp yörergä, terkälmiçä yäşärgä, militsiä tikşerülärennän qurqıp, qaçıp yörergä mäcbür. Şuşındıy, awır xälgä qalğan migrantlarğa, 18 dekaberdäge istälekle kön uñayınnan amnistiä, kiçerü könen ütkärep bulmıymı, dip qızıqsındı jurnalistlar. Nikolay Vladimirov, bu bezneñ öçen bäyräm tügel,dip cawap birde.
Qanunnarnıñ kamilsezlege mäsäläsendä, «Azatlıq» radiosı xäbärçese, Rusiä watandaşlığın alunıñ ciñeläytelgän ısulı turında soraw birde. Ul, xakimiätlärdä, bu mäs’älä inde añlaw bar, dide. Qanun, migrantlarnı millätkä qarap ayırmasa da Rusiägä, şul isäptän Tatarstanda küçenep kilüçelär öçen, ber östenlek saqlana bara. Ata-babaları bezneñ cirlektän çıqqan buluın raslaw kiräk. Ul waqıtta, watandaşlıqnı alu ciñelräk bulaçaq, dide Nikolay Vladimirov. Ä, Watandaşlıq turındağı qanunğa, statusnı alu ciñelräk bulu turında küpme söylänsä dä, yaña qagidälär ğämälgä äle kermägän. Nikolay Vladirmirov kägäze bezneng qulda ale yuq, dide. Matbuğat oçraşuında, şulay, çit il Watandaşların Tatarstan quyıp çığaru turında da süz buldı. Bıyıl 3056 keşe, qulğa alınıp, qaytarıp cibärelgän bulğan. Bu san, 2004 yıl belän çağıştırğanda 2 tapqırğa diärlek zurraq, dielde oçraşuda. Deportatsiägä duçar bulğan, yäğni quyılğan keşelärneñ sanı Qazannıñ 1000 yıllığı belän bäyle dip açıqtan açıq äytelmäde. Ämma, migrantlar üzläre dä, bigräktä avgust ayında awır buldı, dip äytälär. Azatlıq xäbärçesenä Azerbaycan keşese belän söyläşergä turı kilde. Ul monda inde 3 yıllap röxsätsez, dokumentsız yäşi. 1000 yıllıq waqıtında ul, çittän kilgän millitsiä xezmätkärläreneñ küplegenä, qırıslığına zarlandı.Bikä Timerova
