Accessibility links

дүшәмбе, 5 декабрь 2016, Казан вакыты 11:29

“İmanlı buın” möselman yäşläre konferensiäse


İmanlı buın. Rusiä islam universitetında uzğan möselman yäşläre konferensiäse änä şundıy isem astında ütte. Ğämäldä mondıy çara berençese. Kiläçäktä alarnıñ sanın kübäytergä, ä dairäsen kiñäytergä niätlilär.

Çärşämbe irtänge tuğızda İslam universitetınıñ aktlar zalında alma töşärgä dä urın qalmağan ide. Konferensiä Qor’än uqudan başlanıp kitte. Annarı biregä kilgän Ğosman xäzrät İsxaqi älege başlanğıçlarnıñ däwamı xäyerle bulsın dip doğa qıldı. Şulay itep, xäyer fatixalar belän möselman yäşläreneñ berençe konferensiäse başlanıp kitte. Respublika rayonnarınnan ike yözläp delegat kilgän ide. Möfti Ğosman İsxaqi üz çığışında “İslam xäzer üseşeneñ yaña basqıçına mende, bez möselmannar üzebezne üzebez qayğırtırğa tieş”, dip belderde. Yäşlärneñ konferensiäsenä kilgändä isä ul bolay di: “Bu inde küptän kiräk ide. Min wäğdä ittem, kiläçäktä aprel', may aylarında tağın da zurraq külämdä Tatarstan yäşläre genä tügel, ä bälki Rusiä yäşlären dä çaqırıp şuşı çaranı ütkärergä niätebez bar”.

Konferensiäneñ berençe öleşendä doklad belän çığış yasawçılarnı tıñladılar. Yäş möselmannarnı küptörle sorawlar borçıy ikän. Mäsälän, Finans iqtisat institutı studentı El'dar Yäxin “Rusiädä toruçı xalıqnıñ 20 protsentına yaqın öleşe möselman, bu san yıldan-yıl artaçaq, dimäk bezgä yäşlärne progressiv räweştä tärbiälärgä waqıt citte”, digän fiker äytte. Yäştäşlären berdäm bulırğa çaqırdı. Anıñ bu fikere belän Qazan İslam köllätennän kilgän Fäxim xäzrät Şafiev ta kileşte. “Berdäm bulıp üz urınıbıznı almasaq, bezneñ urınnı başqa qaraşlı keşelär alaçaq ” dide ul. Respublikanıñ törle dini uqu yortlarınnan kilgän şäkertlär şulay uq ädäp, äxlaq tärbiäse, eçkeçelek, cämğiättäge azğınlıq turında da söyläşte. Çığu yulların ezläde. Yäş möselman ğailälären toraq belän tä'min itü mäs’äläse dä çittä qalmadı. Ä menä Ramil xäzrät Bikbayıwnı isä tel mäs’äläläre borçıy. Ul islam dinen qabul itügä 1000 yıl isemendäge Qazan yuğarı möselman mädräsäsendä ğaräp tele uqıtuçısı. Anıñ fikerençä, bügenge şäkertlär tatar telen naçar belälär. Bu isä üz çiratında awıllarda wäğäzlär alıp baruğa qomaçawlıy. Ramil xäzrätneñ süzlärençä, Qazan yuğarı möselman mädräsäsendä tatar telen atnasına ikeşär däres uqıtalar ikän. Bu här kursta. Tik dini belem alırğa kergän şäkertlär arasında tatar telen belgännäre bik az. Läkin, dini ğilem aluçılarnıñ qayberläre bezdän tel belgeçe yasarğa tırışalar, dip rizasızlıq belderüçelär dä bar ikän. Ramil xäzrätneñ moña üz fikere: “ Şäkertlär alar dingä çaqıruçı bulıp toralar häm dingä çaqıruçı keşelärne tärbiälärgä tieş. Xalıqnıñ telen belmäsä, ul alar belän urtaq tel taba almıy. Şunlıqtan Tatarstan cirlegendäge şäkertlärgä tatar telen belü zarur, ul ber çara bulıp tora”.

Älege fikerne Tatarstan möftie Ğosman İsxaqida xuplıy.

“Min küptän tügel genä Finlyandiägä barıp qayttım häm miña şul qädär qızıq buldı, şul uq waqıtta min äzräk oyaldım da, ğärländem dä. Şuşı 130 yıl elek şunda kilgän tatarlarıbız üzläreneñ tellären, millätlären, dinnären, ğädätlären saqlap qalğannar. Bik çista itep tatarça söyläşälär. Ä bezdä küp kenä yäşlärebez Qazanda yäşäp tä üzläreneñ tellären onıttılar”.

Öylä namazın uqığannan soñ konferensiäne däwam itterdelär. İke seksiägä bülenep fiker alışu buldı. Bersendä yäş imamnar, ikençesendä studentlar ide. Annarı urtaq rezolyutsiä qabul ittelär. Näticädä isä Tatarstannıñ möselman yäşläre Assotsiatsiäsen buldıru kiräk digän qararğa kildelär.

Ädilä Gaynetdin

XS
SM
MD
LG