Accessibility links

дүшәмбе, 5 декабрь 2016, Казан вакыты 03:33

Putin: "Rusiädä çit il banklarınıñ bülekçäläre eşen tıyarğa kiräk!"


Rusiä citäkçelege inde küptännän ildä çit il banklarınıñ bülekçälären açuğa kisken qarşı çığıp kilä. Häm çığaçaq ta - prezident Putin çärşämbedä Novosibirskidä uzğan kiñäşmädä şulay dip belderde. Ä Rusiäneñ Dönya Säwdä oyışmasına kerüe isä näq menä şul şartnı ütäwgä bäyle, ayırım alğanda Quşma Ştatlar Rusiägä üz yaqlawın barı tik çit il bankları bülekçälären açunı röxsät itkännän soñ ğına birergä teli.

Malayziädäge 30 däräcäle çellädän Seberdäge 15 däräcäle suıqqa qaytıp töşü belän Rusiä prezidentı çit il bankirların ber utqa, ber suğa taşlağan belderü yasadı:

"Rusiä xökümäte ildäge banklar berläşmäseneñ Rusiädä çit il banklarınıñ bülekçäläre eşen çikläw kiräklege turındağı fikere belän kileşä. Asılda bu tıyılırğa tieş. Bu yarış mäs''äläse genä tügel, ul xäzerge şartlarda aqça wä kapitalnıñ niçek xäräkät itüen küzätep tora almawğa, terrorğa qarşı köräşkä dä bäyle, bu xaqta onıtırğa yaramıy. Häm bu bigräk tä aqça yuuğa qarşı köräşkä bäyle", dip añlata üz qaraşın Rusiä prezidentı.

Älegä qädär räsmi Mäskäw Rusiägä çit illärdäge täcribä wä investitsiälärne cälep itü, monıñ öçen tieşle şartlar tudıru zaruriate turında söyläp kilgän ide. Putinneñ Novosibirskidä yasağan soñğı belderüe isä çit il bankları citäkçelären şaqtıy ğäcäpländerde. Mäskäwdäge "Renaissance Capital" xezmätkäre Roland Nash:

"Bu başnı butawçı ber işarä. Älegä qädär Rusiä çit il bankları kilüen xuplap torğan ide. Xäzer inde däwlät başlığınnan şundıy süzlär işetü alarnıñ başın tämam butap, alar Rusiä xakimiatennän añlatmalar teliäçäk", di Mäskäwdäge "Renaissance Capital" xezmätkäre Roland Nash.

Berük waqıtta Rusiä xökümäte üzendä çit il bankları eşläwen tulısınça kire qaqmıy, ägär dä alar ildä ayırım ber bank şirkäte bulıp terkälä ikän, yäğni Rusiä qanunarı häm Rusiä Üzäk Bankı kürsätmäläre nigezendä eş itä başlasa, bernindi dä kirtä quyılmayaçaq, dip belderä. Bügenge köndä Rusiädä "Citigroup", "Raiffeisen", "Societe General" kebek tanılğan banklarnıñ qärdäş şirkätläre eşläp kilä. Häm alarnıñ eşe yaxşı ğına bara, dip belderä Roland Nash:

Rusiä prezidentı süzläre çit il banklarınıñ turıdan-turı açılğan bülekçälärenä qarıy - ä alar inde ğädättä ana bank qayda urnaşqan, şul il qanunnarı nigezendä eşli. Rusiä monıñ belän kileşergä telämi häm anı bu mäs''älädä Rusiä bankları berläşmäse dä xuplıy. Alarnıñ biredä üz mänfäğäte - täcribäle häm bay çit il bankları belän Rusiä bankları ällä ni yarışa almıy, ildäge bank sisteması älegä ul qädär täräqqi itmägän.

Ä inde mäs''äläneñ säyäsi yağı şunda - xakimiat başqa illärneñ qanunnarı nigezendä eşlägän çit banklar aşa kapitalnıñ küpläp ildän kitüennän qurqa. Putin belderüennän şul sizelä. Ämma bolar barısı da irekle säwdäne alğa sörgän Amerika Quşma Ştatları öçen nigezle däğwa tügel. Bu atnada Rusiä Hongkongta Dönya Säwdä oyışmasına quşılu tırışlıqların yañartaçaq, läkin amerikan yaqlawınnan başqa ul moña ireşä almayaçaq. Ä Washingtonnıñ qaraşı şul - Rusiädä çit il banklarına yul açılmıy ikän, anıñ äğzalığına da yul yabıq bulaçaq.

Kärim Kamal
XS
SM
MD
LG