Accessibility links

шимбә, 3 декабрь 2016, Казан вакыты 20:48

Ufa hawa alanında çirattağı ğädättän tış xäl


Ufa xalıqara hawa alanında atnakiç könne çirattağı ğädättän tış xäl buldı. Ufadan Nijnevartovski şähärenä oçuçı “Tu-154” oçqıçı cirdän kütärelep berniçä minut ütügä ük, texnik tözeksezleklär açıqlana. Stabilizator dip atalğan caylanmanıñ saftan çığuın sizep qalğan oçuçılar, şunda uq dispetçer xezmätenä xäbär itä häm kire qaytu öçen röxsät sorıy. Ämma Ufa hawa alanına töşep utırğançı, oçqıçnıñ yağulığın kimetü öçen, küktä yartı säğät buyı äylänep yörergä turı kilä “Tu” oçqıçına. Oçqıçta barlığı 157 passajir häm ekipajnıñ 7 äğzası bula.

Bäxetkä kürä, oçuçılar kire aeroport yalanına cay ğına qaytıp töşä. Nijnevartovskiğa yulğa çığuçılarnı zapasta torğan ikençe “Tu-154” oçqıçına utırtıp ozatalar. Äle avariägä yulıqqan oçqıçnı tikşerü eşläre däwam itä.

Elegräk tä xäbär itelüençä, Ufa xalıqara aeroportında ğädättän tış xällär yış qına bulıp tora. Oçqıçlarnıñ tege yäki bu citeşsezlege gel genä näq menä hawağa kütärelep berniçä minut ütkäç açıqlana. Bäxetkä, älegä keşe qorbannarı bulğanı yuq. Şulay da belgeçlär äytüençä, Başqortstan Hawa yulları aviakompaniäse oçqıçlarına küptän inde nıqlı tikşerü ütkärergä kiräk, çönki alarnıñ küpçelege şaqtıy tawşalğan. Küp kenä keşelär, Ufa aeroportında yış qına qabatlanıp torğan ğädättän tış xällärdän soñ, barası cirlärenä poyezdda, yä bulmasa avtobusta barunı xup kürä başladı.

XS
SM
MD
LG