Accessibility links

пәнҗешәмбе, 8 декабрь 2016, Казан вакыты 19:04

Ufağa Rusiä finans ministrı Aleksey Kudrin kilde


Comğa könne Başqortstanğa Rusiä finans ministrı Aleksey Kudrin citäkçelegendäge zur ğına wäkillek eş säfäre belän kilde. Kudrin äfände Ufada respublika citäkçelege belän oçraşular ütkärep, Başqortstannıñ Rusiägä quşıluına 450 yıl tulu yubileena äzerlek xaqında söyläşülär ütkärä. Mäğlüm buluınça, bu yılnıñ fevral' ayında Aleksey Kudrin şuşı yubileyğa äzerlekne oyıştıru komitetı räise itep bilgelängän ide. Moñarçı anıñ şuşı mäs'älä belän Ufağa kilgäne yuq ide. Şulay itep älege kilüdä ul oyıştıru komitetınıñ berençe utırışın ütkärä.

Qudrin äfändene Ufa hawa alanında respublikanıñ barlıq yuğarı citäkçeläre beryulı barıp qarşı aldı. Aeroportta uq Mäskäw qunaqları Ufanıñ yaña tözeleşläre belän tanışa da başladı. Ufa hawa alanınıñ iske binası da yubileyğa äzerlek barışı qısalarında yañartılırğa tieş. Aña maxsus aqça da bülende häm anda, yañaraq, xalıqara taläplärgä cawap birerlek däräcägä citkerü öçen, tözü eşläre başlanğan ide. Aleksey Kudrin häm anıñ yuldaşları iñ täwdä şul tözeleş eşläre belän tanıştı.

Annan soñ Mäskäw wäkillegen yubileyğa äzerlek qısalarında bülengän aqçalarğa tözelä başlağan başqa ob'yektlarğa alıp bardılar. Ufa timer yul vokzalı, başqalanıñ Aqbuzat ippodromı, Başqortstan xalıqlarınıñ Duslıq yortı, Boz sarayı tözeleşlärendä bulıp andağı eşlär barışı häm ixtıyaclar belän yaqınnan tanıştı Rusiä finans ministrı. Äytergä kiräk, 450 yıllıq yubileyğa bülenüçe aqçalarnıñ zur küpçelege Ufanı tözekländerügä häm maturlawğa totınalaçaq. Monı Başqortstan citäkçeläre bolay añlata: Ufa – respublikanıñ qapqası häm közgese, şuña kürä dä anı bar kilgän qunaqlar soqlanırlıq däräcägä kiterü kiräk. Annan Başqortstan citäkçeläre yış qına tağın ber närsäne assızıqlıy:“Ufa Qazan şähärennän hiç kenä dä qalışırğa tieş tügel, häm ul şulay bulaçaq ta”. Mondıy fikerne Başqortstan citäkçeläre Qazannıñ 1000 yıllıq bäyräm tantanalarına barıp, anıñ niqädär däräcädä maturlanuın kürep qaytqaç yış äytä başladı.

Ufa buylap säfär tämamlanğaç, Mäskäw qunaqları Aq yortqa kilde häm Başqortstannıñ yuğarı citäkçeläre belän söyläşülär ütkärde. Oçraşuda, nigezdä, yubileyğa äzerlekne tieşle däräcädä alıp baru öçen, niqädär külämdä finanslar kiräk bulaçağı täğäyen sannarda tikşerelde. Aldan da äytelüençä, Rusiä yağınnan häm Başqortstan byudjetınnan Başqortstannıñ Rusiägä quşıluına 450 yıl tuluğa äzerlek barışında alıp barılaçaq tözeleşlär häm başqa äzerlek eşläre öçen, cämğısı 44 milliard sum tiräse aqça bülenäçäk. Bügenge söyläşüdä Rusiä finans ministrı aldan uq wäğdä itelgän aqçalarnıñ üz waqıtında küçerelä baraçağına ışandırdı.

Başqortstannıñ Rusiägä quşıluınıñ 450 yıllığı 2007 yılnıñ iyün ayında bilgelänä. Başqortstan cämäğätçelege arasında 450 yıllıq yubileyğa mönäsäbät törleçä. Ämma xalıq barıber dä bu bäyrämgä äzerlekne xuplıy. Ni öçen digändä, şuşı yubileyğa äzerlek säbäple, Ufa çınlap ta nıq qına üzgäräçäk, tözeklänäçäk häm mädäniläşäçäk, digän ömetlär bar. Ä Ufa maturlana ikän – moñardan kemgä zıyan.

Fänis Fätxi, Ufa

XS
SM
MD
LG