Tatarstan sotsial' ipotekasınıñ Rusiä klassik ipotekasınnan ayırması şaqtıy zur. Biredä fatir alır öçen banklarğa yuğarı protsentlı kreditlar tülärgä kiräk tügel. Tatarstannıñ sotsial' ipotekası törle däräcädäge keşelärgä toraq alırğa yärdäm itügä yunälderelgän. Respublikanıñ sotsial' ipoteka programması äle nibarı ber yıl eşli. Şuşı ber yıl eçendä ipoteka 6 meñ keşene fatirlı itkän, ä 11meñnän artıq tatarstanlı fatir alırğa üz çiratın kötä. Kemnär öçen ul sotsial' ipoteka? İpoteka buyınça fatir alır öçen toraq fondı nindi şartlar quya? Bu sorawlarğa Tatarstan toraq fondınıñ citäkçese urınbasarı Midxät Şärifullin cawap birä
64 qanun buyınça, sotsial 'ipoteka barı tik Tatarstanda terkälgän häm yäşägän keşelärgä yunälderelgän. Başqa ölkälärdä yäşäwçelär bu ipoteka belän fatir ala almıy. Monıñ uñay yağı bar, çönki Tatarstanda irekle açıq cämğıättä eşläwçelär, däwlät şirkätlärendä, byudjet tarmağında eşläwçelär bar, invalidlar, matdi xälläre bik naçarları da bar. Sotsial ipoteka älege keşelärneñ toraq şartların yaxşırtuğa yunälderelgän. Sotsial' ipoteka programmasın tormışqa aşıru öçen bez bıyıl xökümättän häm başqa çığanaqlardan 5mlrd 100mln. sum aqça tupladıq. Näticädä altı meñ keşe fatirlı buldı. Kiläse yılğa inde 6 ğına tügel, 7-8 meñ keşe fatirlı itü öçen eşlärbez.Tatarstan prezidentı färmanı belän toraq turındağı yaña programmada awıl keşelärenä yärdäm itü dä qaralğan. Elekke programmada isä bu mäs'älä kertelmägän ide. Alay ğına da tügel, sotsial' ipoteka yäş belgeçlärne, yäş ğailälärne dä çittä qaldırmıy.
Dimäk, sotsial' ipoteka buyınça fatirlı bulu öçen öç şart ütälergä tieş. Berençedän, Tatarstanda terkälü kiräk, ikençedän, şähärdäge fatir mäydanınıñ ber keşegä 18 kvadrat metrdan tübän, ä awıl cirendä 21 kvadrat metrdan azraq buluı. Häm öçençese - keşeneñ eşläw mömkinlege bulırğa tieş. Älege taläplärne isäpkä alıp, cirle xakimiät başlıqlarına ğariza yazarğa bula. Toraq fondı citäkçese Tälğät Abdullin äytüençä, berençe kertelergä tieşle aqça fatir bäyäseneñ 30%tın täşkil itärgä tieş, läkin ğailäneñ matdi xäle bik ük naçar bulsa, berençe vznos ber meñ genä dä bula ala. Häm alay ğına da tügel, berençe vznosnı ğomumän tüli almawçılar da fatirğa kertelgän oçraqlar bar, dide Tälğät Abdullin.
Al'bina Zäynulla
