Accessibility links

якшәмбе, 4 декабрь 2016, Казан вакыты 19:25

Törkiädä Qazan medalläre tapşırıldı


“Qazannıñ meñyıllığı istälegenä” Prezident Putinnıñ qararı belän Tatarstan Prezident Mintimer Şeymiyev qul quyğan dokument belän medallär taratu 15 Dekaberdä İstanbuldağı Rusiä Federatsiäse konsullıq binasında däwam itte. Monnan elek Tatarstan Premierı urınbasarı häm Mädäniät Ministere Zilä Wälieva Ankarada häm bu atna başında ilçelek binasında Rusiä Fedaratsiäse ilçese Petr Stegniy şuşı medallärne tarattıllar. İstanbulda isä yaña başkonsul Aleksandr Krivenko tapşırdı. Ul Stegniydän ayırmalıqlı bularaq Tatarstannıñ da, Şeymievneñ dä isemnären telgä aldı. İstanbulda medallär Eskişehir merı Büyükerşen, İslam Konferensiäse Mädäniät Oyışması citäkçese Eren, Tüpraş direktorı Danış, İdel-Ural belän Eskişähirdäge oyışma citäkçeläre belän alarnıñ yardämçelärenä häm prof. Devlet belän dotsent Önergä birelde. Öner yolağa büläk tä kitergän. Üzeneñ yaña çıqqan “Tatar Cırları” digän kitabın tarattı. Başkonsul Krivenko şuşı medallärneñ Prezident Sezer belän Premier Erdoğanğa da birelgänen, Tüpraş citäkçese isä “Tatarstannan yılına 1,5 millard dolarlıq neft alabız” dip belderüwe qızıqlı faktlar buldı. Şuşı medallär Tatarstannan çittä yäşäwçe 300-läp Tatar wäkilenä dä tapşırılaçaq. Medaldä ber yağında Blogoveçen, Söyembikä belän Qolşärif, ikençe yağında Qazan şähäre gerbı bar. Medallärneñ Tatarstan bayrağı tösläre belän totaştırılğan räweştä birelüwe dä iğtibarğa layıqlı. Şäymievneñ Putinnı künderep monı başqaruwı üzenä kürä uñış, äle dä Tatarstan bar digän süz. Şulay da qayber ğäybätlärgä kürä, Tatarstannıñ İstanbuldağı wäkilçelege Rusiä başkonsulığı binası eçenä alınaçaq ikän. Bu inde qısılğan irekleklärneñ qabat qısıluwı tügel me?

Äxtäm İbrahim, İstanbul
XS
SM
MD
LG