Accessibility links

шимбә, 10 декабрь 2016, Казан вакыты 02:06

Färit Möxämmätşin Semberdä utırış ütkärde


İdelbuyı Federal okrugı töbäkläreneñ cirle parlamentları Bergälege räise Färit Möxämmätşin Semberdä utırış ütkärde. Anda Sember ölkäse başlığı Sergey Morozov täbrik süze belän çıqtı. Ul Cıyınnıñ uñışlı eşläwen teläde häm kürşelärneñ täcribä urtaqlaşuı sotsial-iqtisadi wäzğıätkä uñay tä''sir yasar, digän ömet belderde.

Sember ölkäse Qanunnar çığaru cıyılışı räise Boris Zotov Munitsipal'' berämleklär turındağı qanunnı tormışqa aşıruda yul yarıp, barısınnan da alda saylawlar uzdırunıñ näticäläre belän tanıştırdı. Yaña yılda yaña berämleklär üz eşlären başlap cibärergä tieşlär dä inde. Läkin byudjet mäs’äläse küp sorawlar da tudıra, çönki yaña berämleklärneñ baytağı üz-üzlärne totar xäldä tügel.

Mordoviä respublikasınıñ Däwlät cıyılışı räise Waleri Kiçkin da üz täcribäse belän urtaqlaştı häm bu qanunnı ğämälgä kertü qıyınlıqlarına tuqtaldı. Anıñ fikerençä, xakimiät vertikaleneñ törle basqıçları arasında wazifalar häm xoquqlarnı açıqlaw kiräk.

Färit Möxämmätşin çığışınıñ da töp mäğnäse şuña yaqın buldı. Älege Federal'' Qanun üzgäreşlär häm tözätmälärgä moxtac. Anı aşıq-poşıq ğämälgä kertüneñ tiskäre näticäläre dä ixtimal.

İdelbuyı Federal'' okrugında İñbaşınıñ tulı wäqälätle wäkile urınbasarı Georgiy Matyuşkinnıñ çığışı Prezident kütärep çıqqan proyektlarnı tormışqa aşıru ısulların açıqlawğa bağışlanğan ide. Toraq, mäğärif, sälämätlek saqlaw, awıl xucalığın torğızu - menä nindi töp burıçlar tora ilebez aldında.

Färit Möxämmätşin fikerençä, cämğiät İñbaşı Putinnıñ şuşı 4 proyektın tormışqa aşıru näticälärenä ömetlänep yäşi dä. “Bezneñ burıç – bu proyektlarnı üzläşterüdä aktiv qatnaşu. Östän bülep birelgän aqçanıñ üz urınına barıp citüen, döres qullanılışın tä''min itü öçen, citdi eş alıp barırğa kiräk”, dide Tatarstan Däwlät şurası räise. Çınlap ta, monısı bik möhimder dä. Häm korrupsiä, rişwätçelek yağınnan ğına tügel. Sember yaqlarında byudjet aqçasın kübräk rus xalqı mädäniäte, rus awılları ixtıyaçlarına ğına qullanu moña qädär ğädäti küreneş bulıp kilde iç.

Reglament buyınça waqıtı bik tar buluğa qaramastan, Färit äfände tatar mäğlümlät çaraları xezmätkärläreneñ berniçä sorawına cawap birü mömkinlegen dä taptı. Süz, nigezdä, ut kürşelär Tatarstan belän Sember ölkäse arasında mädäni häm iqtisadi bağlanışlarğa qağılışlı buldı.

Assotsiatsiä äğzaları cıyılışınıñ näq Semberdä buluı Ölkä Qanunnar çığaru cıyılışınıñ 10 yıllıq yubileena da bäyle. Qunaqlar ikençe könne şuña bağışlanuğa çarada qatnaştılar.

Ayrat İbrahim, Sember

XS
SM
MD
LG