Närsä birde bu yıl bezgä? Tabışlarmı, yuğaltularmı?
Mondıy sorawğa uramnarda, Sember tatarlarınıñ töp eş urını bulğan bazarlarda oçrağan tatar balası, ğädättä, şäxsi yaqnı küzdä totıp cawap birä. Kem yaqınnarınıñ üleme, kem ğailä şatlığı belän urtaqlaşa. Küplär rişwätçelekkä batqan türälärne sügälär. Bigräk tä Zurabov yäki Kudrinnı yış iskä alalar. Monısı añlaşıla da: Ulyan kardioxirurgiä üzägen yabunı näq alardan kürälär.
Respondetlarğa sorawnı añlatıp qabatlarğa turı kilä. Bik sirägendä genä ğomum milli ixtıäclarnı qänäğätländerü turında fiker oçrıy. Ä menä milli çaralarda qatnaşuçılar xalqıbızğa qağılışlı ğomum probalamalar turında da uylanalar.
Menä qayber fikerlär.
Semberdä “Bolğar sivilizatsiäse – bezneñ miras” digän kitap çıqtı. Bu isä xalqıbıznı uyatırğa, çın tarixıbızğa yaqınayırğa yärdäm itäçäk.
Qazan qalasınıñ 1000 yubiley Sember tatarlarınıñ ruxın kütärde.
Ağımdağı yılda bez çoqırnıñ iñ töbenä töştek, läkin yänäşä ikençe çoqır päyda buldı. Monısı - Üzäk Räsäy cirlärendä xalıq sanı kimü arqasında. Häm şuşı küreneş Sember yaqlarınnan urıslarnı suırıp ala. Alar urınına şärqi xalıqlar kilä. Monısı inde bezgä uñay şartlar tudıra ala.
Sergey Morozov küp wäğdälär belän xakimiätkä kilde, Älegä anıñ wäğdäläre ütäleşenä ömetne özmibez. Namuslı keşe kebek kürenä üze.
Avtonomiä citäkçelege alışınu ömetlär uyata. Qart “slujivıylar” urınına cegärleräk yäşlär kilde.
Avtonomiäneñ yaña citäkçelege barlıq milli oyışmalarnı da berläşterde. Bu - uñay küreneş.
Munitsipal berämleklär turındağı qanunnıñ töp maqsatı tatar awılların qorıtu bulğanğa, şuşı qanunnı tormışqa aşıru bezgä zur afät kiterä.
Mäktäplärdä aqça birüne uquçılar sanına bäyläp, här sıynıfta 25 bala bulunı taläp itü berençe çiratta urıs bulmağan xalıqlarnı telenä kiterep bärä. Häm tatar teleneñ tamırın qorıtuda xälitkeç rol'' uynayaçaq.
Menä şuşı soñğı ike cawap – iñ yış qabatlanğannarı da.
Bu qanunnarnıñ säyerlege dä küzgä bärelep tora. 2005-yıldağı qanun mäktäplärgä birelüçe byudjet aqçasın kimetüne küzdä tota. Şul uq waqıtta 2006-yıl byudjetında mäktäp çığımnarın 30 protsentqa arttıru qaralğan. Dimäk, eş aqça citmäwdä tügel. Başnı butap, tatar, çuaş mäktäplären tarqatqaç, tatar mäktäplären, ayırım sıynıflarnı yabıp betkäç, şır urıs mäktäpläre genä qala. Dimäk, alarğa aqçanı qızğanmasqa da bula, dilär milli xäräkät aktivistları.
Ayrat İbrahim, Sember
