Accessibility links

җомга, 2 декабрь 2016, Казан вакыты 20:57

Psixologlar yaña berläşmägä ömet tota


Psixologlarğa ğailädä tuğan problemalardan - cäberläwlärdän zarlanıp möräcäğät itüçelär şaqtıy artqan. Bu xaqta syezdda äytelde. Läkin äle xalıq turıdan-turı yärdäm sorarğa oyalamı, ällä öyränmägänme möräcäğät itüçelär süzne bötenläy başqa mäs'älädän başlıy ikän. Qayberläre başta xastaxanädägä möräcäğät itä.

Tormıştağı totrıqsızlıqtan faydalanıp soñğı waqıtta keşeneñ küñelenä ütep kerüçe yalğan psixologlar barlıqqa kilüe mäğlüm. Alar xätta xalıq törkemnäre oyıştırıp eşli başlağannar. Sektalar şularnıñ ber töre. Artıq ışanuçan, başı problemalar belän tulğan xalıq älege törkemnärgä tiz kerep kitä. Psixologlar assotsiatsiäsen oyıştıru syezdına kilgän Tatarstan Däwlät Şurası, Xökümät wäkilläre, ğalimnär, belgeçlär barısı da psixologiä ölkäsendä däwlät tarafınnan tikşerüe bulırğa tieşlegenä basım yasadılar. Kiläçäktä assotsiatsiäneñ berlege bu yunäleştä eş alıp baraçaq. Tatarstan Xökümäte qarşında Koordinatsion Şura buldırunı isäptä tota.

Syezdğa kilüçelär psixologiä ölkäsendä eşläwçelärgä litsenziä birü Rusiä külämendä oyıştırılırğa tieşlegenä basım yasıy. Sişämbe könne alar Rusiä Xökümätenä möräcäğät qabul ittelär.

Qorıltayda kadrlar mä’säläsenä ayırım tuqtaldılar. Yılına Tatarstan yuğarı uqu yortlarınnan 3 meñ keşe psixolog belgeçlegen alıp çığa. Berniçä yıl elek kebek älege professiädä qıtlıq yuq, kiresençä eş tabu mä’säläse kilep tua. Awıllarda psixologlarğa ixtıyac yuq. Xalıq problemasın kürşegä kerep söyli.

Bügenge köndä xezmät bazasın buldıru kiräklege assızıqlandı qorıltayda. Här sotsial' yaqlaw oyışmasında ber bulsa da psixolog bar. 300 däwlät oyışmasında bügenge köndä 3 meñnän artıq psixolog xezmät itä. Monnan tış 224 ictimaği oyışmalar häm fondlarda psixologlar bar.

Yuğarı uqu yortalırnda psixologiä ölkäsendä uqıtu standartın üzgärtü kiräklege dä assızıqlana. Xäzergä barı meditsina uqu yortların tämamlawçı psixologları ğına uñay eşli dip bäyälänä.

Landış Xarrasova.

XS
SM
MD
LG