Accessibility links

шимбә, 10 декабрь 2016, Казан вакыты 06:04

Pop cırçı Cämilä 22 yıldan soñ ätisen ezläp taptı


Bu könnärdä, tatar cır sänğäten söyüçelär arasında ğibrätle xälne qat qat söylilär. Finländiädä yäşäwçe tatar cırçısı Cämilä, 22 yıl kürmägän ätisen tapqan. Häm niçek itep äle. Rusiä TV kanallarının bersendä baruçı Jdi menya tapşıruı yärdämendä. Häm bu könnärdä genä ul ätise belän küreşkän. Bu xaqta yaña ğına çığa başlağan “Käyef niçek” gäzite yazıp çıqtı.

Cämilä, bügenge köndä, tatar tamaşaçıları arasında şaqtıy populyar cırçı. Ul, tatar estradasına ber yaña, könbatışçaraq ağım bulıp kilep kerde. Bügenge köndä, Aydar Ğäynullin digän, Awrupada nıq tanılğan bayançı belän duyetlar başqara

Аудіо Cır

Cämilä Rusiädä yätimlektä üskän qız. Perm yaqlarında tuıp, änisennän biş yäştä qala ul. Änisen üterälär. Ätise ul waqıtta ayırım yäşi torğan bula. Cämiläne äbise tärbiäli. Läkin, berniçä yıldan soñ ul da fani dönyadan kitä. Yätim qıznı tuğannarı tärbiäli.

Cämilä Finländiä tatarına kiäwgä çığa. Xäzer inde öç balası bar. Läkin, ğömereneñ iñ bäxetle mizgellärendä yäşäsä dä, üzeneñ süzlärenä qarağanda, anı gel ätisen ezläp tabu, änisen qäberen qayda ikänen belü borçıy. Xäyer, Cämiläne üzen tıñlıyq äle

Minem änineñ qäbere gel küz aldında tordı. Üzem anı kürmägän bulsam da. Min balalarıma, äbiegezneñ qäberen qayda ikänen belmim, babağıznı kürgänem yuq dip äytü bik awır ide

Käyef Niçek gäzitendä basılıp çıqqan, Cämiläneñ 22 yıldan soñ etise belän küreşkänlege turındağı yazma bastırdı. Gäzit redaktorı Danil Säfärov älege oçraşuda qatnaşqan keşe

Perm'dä şuşı oçraşu Cämiläneñ bik ozaq kötep alınğan oçraşuı buldı. Bez anıñ belän bergä bardıq, tuğannarın kürdek. Cämilä süzlärenä qarağanda, ORT kanalınnan Jdi menya tapşıruın qarap utırğanda, anıñ gel nindider ömete bulğan, anı ätise ezlär digän. Häm üze ul, tapşırunıñ internet säxifäsenä kerep, yazıp qaldıra, ätisen ezläw turında. Ozaqlamıy, tapşıru xezmätkärläre, anıñ ätisen tabalar. Perm şähärendä yäşi bulıp çığa. Ätise dä şulay uq, anı äzlägän. Tapşıruğa bu turıda syujet kermi qaldı, çönki, ätisenä tabiplar yıraq säfärgä yörüdän tıyğannar. Şuña kürä, Cämilä başta Qazanğa kilgän ide. Qazannan bez bergäläp Perm'gä bardıq. Cämiläneñ äbise, anı änieñne ätieñ üterde dip tärbiälägän. Läkin, bu çınlıqqa turı kilmi. Çönki, ätise, änise üterelgändä, ğomumän taşkent yaqlarında bula. Ä änise Permdä üterelä. Cämilä, xäzer bu turıda bik ükenep söyli

Danil Säfärov, “Käyef niçek” gäzite baş möxärrire buldı.

Cämilä üze bu oçraşu xaqında tınıç qına söyli almıy. Cırçını yaqınnan belüçelär, anıñ xisçän itkänlegenä gel iskärtälär. Älege oçraşu xaqında şuña kürä, Käyef Niçek gäzite redaktorı Danil Säfärovtan soraşabız

Ätise belän küreştelär. Äniseneñ qäberen ezläp taptılar. Cämiläneñ, tağın ike señelese bar bulıp çıqtı. Aları başqa anadan tuğan. Şularnıñ berse ätise belän yäşi. Mäktäptä uıyi. Monnan tış, Cämiläneñ enese dä bulğan. Läkin, berniçä yıl elek anı ütergännär

Cämilä, ul şuşı oçraşunı äzerläwdä yärdäm itkän Käyef niçek gäzitenä räxmätlären citkerde.

Cırçı ätise belän daimi elemtädä tora. Beraz awırraq xäldä yäşäwçe tisenä yärdäm itä.

Räfis Cämdixan

XS
SM
MD
LG