Accessibility links

якшәмбе, 4 декабрь 2016, Казан вакыты 23:28

Omskida “Läysän” törkeme konsertı


Uzğan yäkşämbedä Omskida Novosibirskinıñ ölkä tatar mädäniät üzäge qarşında eşläwçe “Läysän” estrada törkeme zur konsert programması belän bulıp kitte. Äytergä kiräk, bu kollektivnıñ Omskiğa berençe genä kilüe tügel. 1998-nçe häm 2000-nçe yıllarda alarnıñ Omski tamaşaçısınıñ mäxäbbäten ayulap kitüläre turında “Azatlıq”ta da beldergän idek. Bu yulı “Läysän” kollektivı artistları şaqtıy kötterep, biş yıldan soñ ğına kilä aldılar. Elek kilülärendä alar xalıqqa konsert kürsätü belän genä çiklängän idelär. Xäzer isä konserttan soñ “Läysän” törkeme belän Omskinıñ “Umırzaya” kollektivı häm qayber tamaşaçılar öçen aralaşu oyıştırıldı. Öç säğättän artıqqa suzılğan bu aralaşu, fiker alışu canlı ütte, kollektivlar üzläreneñ uñışları, qazanışları, problemaları turında söylädelär. Oçraşuda qatnaşqan tamaşaçılar da, “Umırzaya” ansamble häwäskärläre dä “Läysän” törkemeneñ başqaru ostalığınıñ üseşen bilgelädelär, kollektivlar arasında icadi bäyläneşlär urnaşuı ike yaq öçen dä ähämiätle dip äytep üttelär. Bez qayda yäşäsäk tä tatarlar, tatar buluım belän ğorurlanam,- digän yalqınlı çığışlar da buldı.

“Läysän” kollektivı üzeşçännäre üz çiratlarında cılı qarşı aluları öçen Omski tamaşaçılarına räxmätlären belderdelär, qısqaça ğına üzläreneñ icat yulları turında söylädelär.

”Läysän” estrada törkeme belän bez berençe anşlagnı Omskida alğan idek, annan soñ Pawlodarda, Semipalatta buldıq, 1999-nçı yılda Qazanda tatar cırı konkursında diplomat iseme alıp qayttıq... tatar biüenä şul qädär keşeneñ çığuı bik küñelle buldı.

Soñınnan söyläşü çäy östäle artında däwam itte. İke şähärneñ dä kollektivları kiläçäktä dä tığız bäyläneştä eşläw zarur dip assızıqladılar. “Umırzaya” kollektivı yaña yılda kiçekmästän Novosibirskiğa konsert belän barırğa wäğdä itte. Kollektiv citäkçese Ğafiä Aleeva qızıqlı täqdim belän dä çıqtı.

Sezneñ estrada, bezneñ fol'klor, äydägez, bergäläp Novosibirski awıllarında, Omski ölkäsendä konsertlar oyıştırıyq äle

Ğafiä Aleevanıñ täqdime xuplap qabul itelsä dä, tögäl eş başlaw turında älegä süz quzğatılmadı.

Rozaliä Sayganova, Omski

XS
SM
MD
LG