Accessibility links

Кайнар хәбәр

Semberdä Salix Säydaşev tuuına 105 yıl tuluğa bağışlanğan kiçä uzdı


Küptän tügel genä Ul'yanovsk şähäreneñ 17 nçе kitapxanäsendä «Sağına xalqım moñlı Saydaşın» dip isemlängän ädäbi- muzıkal' kiçä bulıp uzdı. Ul tanılğan kompozitor Salix Säydaşev tuuına 105 yıl tuluğa bağışlanğan ide. Kiçä şähär mäktäpläreneñ milli sıynıflarında belem aluçı balalar öçen oyıştırılğan. Şuña kürä säxnädän çığış yasawçılarnıñ da, qarap toruçılarnıñ da küpçelege uquçılar ide.

Soñğı waqıtta mondıy kiçälärdä 15 nçе häm 28 nçе mäktäplärdä belem aluçı tatar balaları aktiv qatnaşa başladılar. Bu yulı da alar sınatmadılar. Şuşı uqu yortlarınıñ ana tele uqıtuçıları Xayrullova Ğaliä, Gizatullina Sufiä, Kolakova Gölnara 4 nçe häm 8 nçе sıynıf uquçıların alıp kilgännär ide. Balalar zur qızıqsınu belän Salix Säydaşevnıñ tormış yulın häm icatın çağıldırğan kürgäzmä belän tanıştılar häm älbättä üzläre dä kiçä barışında bik aktiv qatnaştılar. Mäsälän, 4 nçe sıynıf uquçısı Kolakova Liliä «İx, küñelle emäse!» şiğeren söyläde.

Kitapxanäçe Gölfiä Sämiğullina, kiçäne bik qızıqlı häm eçtälekle itep oyıştırğan ide. Bäyräm böyek kompozitornıñ äsärlärennän özeklärdän tözelgän kompozitsiä belän başlanıp kitte. Anı pianinoda «Xıyal» balalar vokal' ansamble citäkçese Alsu Salaxova başqardı. Şulay uq kiçä barışında kitapxanäçe Railä Vaxitova uquçılarğa Salix Säydaşevnıñ tormış yulı häm icatı turında mäğlümatlar birde. Tanılğan şağir Rifqat Xismät maxsus, kompozitorğa bağışlanıp yazılğan şiğeren uqıdı.

Bäyrämneñ tağın ber yäşeren teması bar şikelle toyıldı, ul da bulsa bäxet töşençäsen bilgeläw. Şuşı temağa bağışlanğan bik küp şiğerlär, cırlar yañğıradı. Mäsälän, Alsu Salaxova «İñ zur bäxet» cırın başqardı, Pedagogiä universitetınıñ milli 5 nçe kurs talibäse Aygöl Qaraqaşeva da «Min bäxetle» şiğeren söyläde. Kiçäneñ azağında milli xäräkät aktivistı Ayrat İbrahimov Salix Säydaşevnıñ icatına qağılışlı qızıqlı waqiğalar belän tanıştırdı häm tağın ber mäşhür kompozitorıbız, Semberdäge Qızıl komandirlar kursın tämamlap şunnan uq suğışqa ozatılğan Färit Yarullinnıñ häläk buluı säbäpläre turında söyläde.

Kiçä Salix Säydaşevnıñ dön'yaküläm tanılğan “Qızıl armiä marşı” belän tämamlandı.

Culpan Firğalieva, Sember.

XS
SM
MD
LG