Accessibility links

Кайнар хәбәр

Mintimer Şäymiev 2005 yılğa yomğaq yasadı


Pänceşämbe könne Qazan Kremlendä Tatarstan Prezidentı Mintimer Şäymiev Tatarstannıñ respublika, rayon, şähär, şulay uq Rusiä häm çit il mäğlümat çaraları jurnalistları belän oçraştı.

Bu oçraşunı ğädäti brifing yäki press konferensiä dip äytep bulmıy. Prezident apparatınıñ qunaqlar qabul itä torğan iñ zur zalı jurnalistlar belän şığrım tulı ide. 15 artıq tele kamera, yözlärçä mikrofonnar ğädättän tış waqiğanı yazdırıp alırğa äzer ide. Xäyer oçraşunıñ teması tabiği häm aldan iğlan itelgän 2005 yıl yomğaqları. Zalnıñ urtasındağı urınnıñ küpçelege rayon häm şähär gäzitläre, teleradiokompaniälär citäkçeläre belän tulı ide. Xätta Tatarstan tele- radio kompaiäse citäkçese Ayrat Sibgatullin, “Tatmedia” agentlıgıñın general' direktor urınbasarı Sömbel Xäyrullina häm “Zvezda Povolj'ya” gäzite baş möxärrire Räşit Äxmätov barı tik zalnıñ iñ artqı öleşendä balkon astındağı poçmaqta ğına urın tapqan idelär.

Dimäk, Prezident äytkännärgä, yomğaqlarğa iğtibar bik zur bulıp çığa. Respublika prezidentı 1 säğät däwamında Qazannıñ 1000 yıllığı, iqtisadıy, sotsial' üseş häm kiläçäk turında söyläde.

Konkret sannar, isemnär küp äytelde. Tağın ike säğät däwam itkän sorawlarğa cawaplar birü şulay uq eçtäşlekle. Ğauğasız, tınıç barğan bu äñgämä bügenge Tatarstan elitasınıñ soñğı waqıtta ireşkän uñışların çağıldıra. Qazan yanındağı Yuğarı Oslan rayonında, İdelneñ qarşı yağında şähärneñ yaña uramnarın tözü planı, neft’' eşkärtü, yaña çit il maşinaların citeşterügä kereşü jurnalistlarnıñ qızıqsınuın uyattı.

Bu oçraşuda kisken milli häm säyäsi mäs'älälär ällä ni yış kütärelmäde. Soñğı waqıtta tatarça söyläwçe çinovniklarnıñ, ğomumän tatarça çığış yasawnıñ siräk oçrawı küzgä taşlana. “Watanım Tatarstan” gäzite möxärrire Minnazıym Säfärov sorawı mäktäptä tatar telen öyränü belän bäyle ide.

Prezident tatar telen qullanırğa berkem dä qomaçawlamıy, milli telne qullanu bezneñ üzebezdän tora dip añlatma birde. Tatarça tağın ber soraw birüçe Udmurtiädän kilgän İrek Şäripov buldı. Tatarstan çit töbäktäge tatarlarğa yärdämne tuqtatmayaçaq dip wäğdä itte Mintimer Şäymiev.

Xäzer iqtisat, sotsial' mäs'älär, eş xaqı belän mawıqqan jurnalistlar qänäğät qaldı. Soñğı soraw birüçe, Tatarstan yäşläre gäzite baş möxärrire İsmägıyl' Şäräfiev sorawına, Prezidentıñ yaña yılnı qayda,niçek qarşılawı turında bolay dide: “Sin üzeñ niçek, mindä näq şulay”. Ä foyeda jurnalistlarnı şampan şäräbe salınğan bokallar kötä ide. Tatarstanda yaña yılnı qarşılaw şulay başlandı.

Rimzil Väli

XS
SM
MD
LG