Accessibility links

җомга, 9 декабрь 2016, Казан вакыты 16:51

Qazan şähär deputatlar şurası taraldı


Qazan şähär deputatlar şurasınıñ pänceşämbe könne soñğı utırışın ütkärde. Bu monnan 6 el elek saylanğan deputatlar cıyını ide. Munisipal xakimiät ükçägä basıp kilä. Yaña yıl yaqınlaşqan sayın, elek saylanğan deputatlarnıñ, elekke citäkçelärneñ eş mötdäte betä bara. Xalıq wäkilläre, pänceşämbe könne, tabın yanında cıyılıp, ber-bersenä räxmätlären belderep, yaña yıl belän qotlaşıp, taraldılar. Ä aña qädär, elekke Qazan şähär deputatları, cirle eşmäkärlärne yaqlarğa çaqırdılar häm «Şähri Qazan» gäziteneñ kiläçäk yazmışın xäl ittelär. Deputatlar cıyılışına kön tärtibenä, barı 7 genä mäsälä çığarılğan ide. Ämma alarnıñ da, öçese alındı. «Şähär xalqınıñ sälämätlegen saqlaw», «mäğärifne üsterü» programmaları, Qazannıñ üseş strategiäläre munisipal Şähär Duması xozurına qaldı. Ä pänceşämbe utırışında, deputatlar, eşmäkärlekne üsterü programmasınıñ ütäleşe xaqında mäğlümat tıñladı. Programma nigezdä ütälgän, binalar tözeleşe öçen cir bülenep birelgän, arendağa milek alu tärtipläre ğadiläşterelgän häm başqa çaralar kürelgän. Ämma, küplär farazlağan äyber, çittän kilgän zur säwdä çeltärläreneñ, gipermarketlar tözegän ere şirkätläreneñ cirle eşmäkärlärne bazardan qısrıqlap çığaru başlanğan. Deputatlar utırışında da süz şul xaqta bardı. Eşmäkärlekne üsterü keçe komitetı räise Färit Minhacev, kibetläre yabılğan keşelergä säwdä bazarında başqa urınnı alırğa çaqırdı. Mäsälän, adım sayın kibetlärne buldırırğa täqdim itte ul. Toraq yortlarnıñ işek allarındağı keçkenä kibetlär, qullanuçılarğa da, eşmäkärlärgä üzlärenä dä faydalı biznes bula alır, di ul. Xäzerge waqıtta Qazanda 4meñgä yaqın kibet isäplänä, monda zur säwdä şirkätläreneñ dä, ayırım eşmäkärlärneñ dä kibetläre kerä. Här işek aldında kibet açu täqdimen Qazanda eşlekle keşelär kütärep alsa, kibetlär sanı 4meñgännän dä artaçaq, ämma barıber qullanuçılar bulaçaq, artığı bulsa, bazar üze caylar, dide deputat Färit Minhacev. Ul şulay uq, zur säwdä şirkätläreneñ cirle citeşterüçelärneñ tovarların äyläneşkä bik almawına, çittän kilgän azıq-tolek häm başqa tovarlarnıñ säwdä äyläneşennän qısrıqlanıp baruına da munisipal Şähär Duması deputatlarına iğtibarnı yünältergä çaqırdı.

Deputatlar şulay uq, «Şähri Qazan» häm «Kazanskie vedomost’» gäzitläreneñ kiläçäk yazmışın xäl itte. İnde xäbär itkänebezçä, qanun munisipal xakimiätlärgä üz gäzitlären buldırırğa, totarğa röxsät itmi. Şuña kürä, bu ike gäzitneñ şähärneke digän statustağı eşçänlegen yaña yılda tuqtarğa tieşlär ide. İnde deputatlar, munisipal reforma turındağı qanunğa tözätmälär kertüne täqdim itep qaradı. Başqa yulların ezläp qaradı. Ämma, mäsälä, gäzitlärne ğämälğä quyu xoquqların «Tatmedia» ağentlığına tapşıru belän xäl itelde. Bu xaqta, 5 dekaberdä çıqqan Prezident färmanında süz bara. Qazannıñ ğına tügel, başqa şähär häm rayon xakimiätläre tarafınnan gämälğä quyılğan gäzitlärgä gä «Tatmedia» qaramağına küçärgä turı kilä. Finanslaw da, respublika byudjetınnan, «Tatmedia» ağentlığına baraçaq. «Şähri Qazan» gäzite baş möxärrire Äğzam Fäyzraxmanovnıñ äytüenä qarağanda, bu qarar belän ber närsä dä üzgärmi diärlek. «Şähri Qazan» şulay uq, şähärneñ milli gazetası bulıp qalaçaq, şähär duması çığarğan qararlarnı da bastırıp baraçaq, ämma inde kileşü nigezendä häm azraq külämdä, - dide «Şähri Qazan» gäzite wäkille Äğzäm Fäyzraxmanov.

Bikä Timerova.

XS
SM
MD
LG