Uzğan yıl belän çağıştırğanda, respublikada balalar üleme şaqtıy azayğan dip xäbär itte bügen qayber räsmi mäğlümat çaraları. Monı alar, xalıqnıñ yaxşıraq yäşi başlawı, meditsina ölkäsendä dä uñay üzgäreşlär bulu belän añlata. Ul, xalıqnıñ kön tormışı yaxşıra dip, sannar kiterü xäzer bik modada. Böten Rusiä idäräçeläre, alarğa iärep töbäktägeläre dä ex matur sannar kiterä. Xalıq tormışı il üsäsen kön üsä kebek. Qazannıñ elekkege başlığı Qamıl İsxaqov, ber märtäbä, qazanlılarnıñ tormışı 5 tapqır yuğarıraq dip belderde. Ällä siksänençe, ällä tuqsanınçı yıllar belän çağıştırıp. Sovet çorındağı böten iqtisadıy üseşne 1913 yıl belän çağıştırğan kebek. Gel yaxşı kürenä bit. Ä yünle illär, kürşeseneke belän çağıştıra. Yarar, monısı ber xäl. Tatarstan prezidentı Mintimer Şäymiev ta, Tatarstan xalqınıñ ğomum tormış xaläte yaxşıra bara dip belderde, pänceşämbedäge jurnalistlar belän oçraşuında. Döres, tögäl sannar äytmäde. Beraz ğına yaxşıradır anısı, süz dä yuq. Xäyer, monı tögälräk, xalıq üze äyter:
-600 sumğa arttı axrı inde. Yarıy inde, ike-öç eştä bit min. Kibettä cıyıştıruçı da, töyaüçe dä, fasovşçik ta. Barsı bergä 5.200 sum çığa inde ayına.
-(saqçı) Min sizmädem artqanın. Artmadı şikelle.
- marşrut şoferı) Yuq, mineke toçno artmadı. İkençe eşkä küçep kildem, xezmät xaqım artmadı ğına tügel, monda kiresençä bik tübän xäzer.
-Universitetnı tämamlap, berençe yıl ğına eşlim äle. Andıy sorawğa cawap birergä irtäräk äle miña.
-(uqıtuçı) Nindi artu di!!! Ber tiengä dä artmadı! Kiresençä kimetep quydılar!!! Bıyıl voobşçe beterdelär aqçanı.
-(TDGPU, muzfak, vaxter) Yuq, bezneñ xezmät xaqı artmıy inde ul! Bik az, bik az…
