Accessibility links

якшәмбе, 4 декабрь 2016, Казан вакыты 23:32

Omski sänğätkärläreneñ Bolşereçye säyäxäte


2005 yılnıñ yazında başlıq bulıp Viktor Şreyder saylanğannan soñ Omski şähäre tormışında törle yünäleşlärdä qayber uñay üzgäreşlär küzätelä başlandı . Döres küzgä kürengän üzgäreşlär asılda binalarnı, uramnarnı, yullarnı tözekländerü kebek eşlär buldı. Yıl axırında yaña citäkçeneñ iğtibarı ictimaği, şul isäptän milli oyışmalarğa da yünältelde. Noyäber ayında meriya qarşında ictimaği oyışmalarnıñ koordinatsiä şurası tözelep, eşli başladı. 120 keşedän torğan bu şura üzeneñ eşçänlegen 9 törle yünäleştä alıp bara. Uzğan atnada älege şuranıñ kiñäytelgän utırışı bulıp uzdı. Anda şura ägzäläre, qayber cirle mäğlümat çaraları xäbärçeläre, ictimaği häm milli oyışmalar wäkilläre, cämğısı 500 keşe qatnaştı. Utırışnı Viktor Şreydor alıp bardı häm bu oçraşu şuranı täbrik itü kiçäsenä äylände diärgä mömkin. Süz anda asılda şähär citäkçelege belän ictimaği oyışmalar arasında eşlekle bäyläneşlär urnaştıru turında bardı. Koordinatsiä şura sostavına tatar oyışmaları citäkçeläre - şähär milli-mädäni möxtäriäte räise Ğafiä Aleeva häm ölkä möxtäriäte citäkçese Xäkim Sadıykov kertelde. Yaña şuranıñ milli xäräkät üseşenä nindi dä bulsa yärdäme bulırmı, älegä äytüe qıyın.

“Umırzaya” ansamble häwäskärläre uzğan şimbä-yakşämbe könnärendä konsertlar belän Bol''şereç''ye rayonına barıp qayttılar. Yulğa çığu öçen transportnı alarğa “Yenisey” korporatsiäse citäkçese Tamir Alimbaev birde. Ber uñaydan tıñlawçılarğa şunı da citkerergä kiräk, ölkä üseşenä kertkän öleşe öçen Tamir äfändeneñ räseme küptän tügel genä Kirov okrugınıñ “İñ yaxşı keşeläre” digän maqtaw taqtasına kertelde. 2005 yılnı şundıy uq maqtawğa tağın ber millättäşebez layıq buldı. Şähärneñ Üzäk okrugında toraq yortlar kommunal xucalığında slesar'' bulıp eşläwçe Ğalim Möxamadeevneñ räseme dä okrugnıñ maqtaw taqtasına quyıldı.

“Umırzaya” ansambleneñ säfärenä kilgändä, Bol''şereç''ye rayonı Omskidan çağıştırmaça yaqın – 200 çaqrım yıraqlıqta ğına bulsa da, kollektiv soñğı 4-5 yıl eçendä , artistlar siräk bula torğan, ölkä üzägennän 500-600 çaqrım yıraqlıqtağı awıllarda yäşäwçe millättäşlärebezgä tatar mädäniäten citkerüne maqsat itep quyıp, bu rayonda tuqtalıp tormıylar ide. Döres, Bol''şereç''ye rayonında yäşäwçelär tatar mädäniätennän çittä bulmadılar. Rayon üzägendä eşläwçe “Bolğar”, Ülänkül awılınıñ “Yädkär”, “Naza”, “Yäşlek”, Quşkül awılınıñ “Çişmä”, Yälankülneñ “Tamaşa” kollektivları xalıqqa härdaim tatar moñnarın citkerep tordılar.

Üzlärendä konsertlar bulıp torsa da, Ülänkül xalqı, “Konsert belän bezgä dä kilegez” dip, “Umırzaya” kollektivın çaqırıp tordı. Häm menä “Umırzaya” sänğät''kärläre , alarnıñ üteneçlären iskä alıp, Bol''şereç''ye rayonına yul tottılar. İke kön eçendä alar Ülänkül awıl xakimiäte qaramağında bulğan Tosqazan, Qaraqül, Çernalı awıllarında häm Ülänkülneñ üzendä konsertlar quydılar. Oyıştıru eşlärendä alarğa awıl xakimiäte başlığı Zıyätdin Çumarov yärdämgä kilde. Ber uñaydan şunı da äytep ütärgä kiräk, üktäber ayında ölkädä awıl xakimiätläre başlıqların saylawlar uzğan ide. Nämzätlär isemlegenä kertelgän bulsa da, Zıyätdin äfände saylawda uñışqa ireşä almadı, 1-nçe ğinwardan ul eşlärne yaña citäkçegä tapşıraçaq. Forsattan faydalanıp, “Umırzaya” kollektivı belän ul Ülänkül'' xakimiäte qaramağında bulğan awıllarğa barıp, xalıq belän sawbullaşıp qayttı. Başlıq bulıp eşlägändä kürsätkän yärdämnäre öçen räxmätle buluın belderde, citäkçe alışınu - tormışığızğa uñay üzgäreşlär kitersen digän telägen citkerde.

“Umırzaya” ansamble sänğätqärläre dä konsert kürsätü belän genä çiklänmädelär. Alar xalıqqa Omskida tatar aktivistları köçe belän näşer itelä torğan “Tatar dönyası” gazetasın tarattılar, aña buşlaw, yäğni iğänäçe Tamir Alimbaev isäbenä, yazılu da oyıştırdılar. Şulay itep, xalıq “Umırzaya” kollektivı belän oçraşunı bäyräm kebek qabul itsä, tatar gazetasına yazılunı büläk itep qabul itte.

Saniä Mirxaleewa, Omski

XS
SM
MD
LG