Accessibility links

якшәмбе, 4 декабрь 2016, Казан вакыты 13:26

Citäkçelär xalıqnı qotlawda yarışa


Xäzer, Tatarstanda, zur häm keçkenä oyışmalarda yaña yıl kiçäläre bara, büläklär öläşü bara. Premyer ministr Röstäm Miñnexanov eşmäkärlär belän oçraşıp, alarnı bäyräm belän qotladı. Prezident Mäskäwdä bulğan arada, Parlament räise Färit Möxämmätşin, Kremldä däwlät büläklären tapşırdı. Büläklänüçelär arasında Qazan däwlät universitetı professorı Xatıyp Miñnegulov bulğan, ul «Aatqazanğan fän eşleklese» digän isem alğan.

Tatarstan Prezidentınıñ, Mäskäwdäge Däwlät Sovetı utırışında qatnaşıp qatqannan soñ, Respublika çırşı bäyrämendä qatnaşuın kötälär. 28 könne, yäşlär ministrlığı, yaxşı uqığan, bäygelärdä ciñgän, iñ aqıllı ber niçä meñ balanı cıyıp, yaña yıl bäyrämen oyıştıra. Älege bäyrämdä balalarğa büläklär häm Prezident qotlawı tapşırılaçaq.

Qazan şähär idäräse başlığı İlsur Metşin, Prezidenttan qalışmıy. Ul da üzeneñ bäyräm qotlawların Qazan balalarına yullağan. Başqaladağı mäktäp, balalar baqçalarında taratılğan büläklär belän, şähär merı İlsur Metşin, dip imzalanğan, Qazannıñ 1000 yıllığın çağıldıruçı räsemnär belän bizälgän, urısça, tatarça qotlawlar da taratılğan.



İlsur Metşin, şulay uq, şähärneñ iñ tanılğan keşeläre belän yaña yıl oçraşuın uzdırdı. Anda mäşhür cırçı İlham Şakirov, cämäğät eşleklese Tufan Miñnullin, yıl uqıtuçısı isemen alğan Yelena Kursova, şulay uq, tanılğan sportçılar, tabiplar qatnaşqan. Meştin, qunaqların bäyräm belän qotlap, mädäniätkä, sälätle balalarğa, studentlarğa yärdäm itep torırğa wäğdä itkän.

Bikä Timerova.

XS
SM
MD
LG