Accessibility links

якшәмбе, 11 декабрь 2016, Казан вакыты 09:01

Roza Tufitullova Rusiä ictimağiy palata äğzası


Şuşı könnärdä Rusiä ictimaği palatasına soñğı 42 wäkil raslandı. Älegä 84 keşe arasında ber tatar ğına, Rusiä möftilär şurası räise Ravil Gaynetdin genä bar ide. Anı Rusiä Prezidentı täqdim itte. Nihayät, 7 federal' okrug wäkilläre arasınnan da ictimaği palatağa 42 keşe saylap alındı. Alar arasında “Söyembikä” jurnalınıñ elekke baş möxärrire Roza Tufitullova da bar.

Jurnalist häm cämäğät eşleklese Roza Tufitullova üzeneñ eşçänlegen Qazan televideniese studiäseneñ balalar öçen tapşırular redaksiäse möxärrire wazifasında başlap cibärgän bulsa, annarı “Yäş leninçı” gazetasında, “Yalqın”, “Söembikä” jurnallarınıñ baş möxärrire buldı. Şunnan soñ “Aq qalfaq” tatar xatın – qızları assotsiatsiäse räise, Böten dönya tatar kongressı başqarma komitetı räis urınbasarı, Tatarstannıñ xalıq deputatı buldı. Anda ul Tatarstan Däwlät Şurasınıñ sotsial' mäs'älälär, balalar häm yäşlär eşläre buyınça daimi komissiä äğzası eşen alıp bardı. Xäzer Rusiä ictimaği palatası äğzası bulıp raslanğan Roza xanım berençe märtäbä Azatlıqqa interv'yu birde.

-Roza xanım, menä sez Rusiä ictimagıy palatasına saylandığız. Sezneñçä, milli cämğiätneñ, cämäğätçelekneñ fikere däwlät qararların tikşergändä kiräkme häm bügenge köndä bu mömkinme?

-Min üzemä tağın da cawaplıraq eş alam, ämma inde ğömeremneñ 30 dan artıq yılı şunı ictimaği fikerne tuplawğa kitte dip äytsäm ber dä yalqışmam, çönki min professiäm buyınça jurnalist.

Bügenge köndä cämäğätçelekneñ tawışı häm fikere zur däwlät eşläre, zur programmalar qabul itkändä iskä alınıp kilde dip äytep bulmıy. Cämäğät eşleklese häm jurnalist bularaq ta ictimaği fikerneñ köçen yuğalttıq bez. Şul säbäple yuğarı vlast'neñ cämäğätçelek fikerenä omtıluına min ömetläremne bağlıym. Hiçşiksez millätebez turında da, xalqıbıznıñ kiläçäge turında da fikerlär kütäreler dip uylıym. Minemçä, aldan ömet bulırğa tieş. Bu palatanıñ Rusiädä tözelep kitüe nindider üzgäreşlär buluın xäbär itä torğan eş dip sanıym min monı.

-Roza xanım, sez menä ömet dip äyttegez, sezneñ moña qädär eşlängän eşlärneñ kübese tiz genä ömetne aqlıy torğan tügel kebek toyıla. Äytik, Tatarstan Prezidentı qarşındağı yarlıqaw komissiäse bik cannı özgäli torğan eş, şulay uq däwlät Şurasında sez demografiä, ğailä, xalıq sanınıñ kimüe turında açınıp citdi analizlar birgän keşe . Rusiä külämendä, Prezidentqa şuşı äyberlärne işetterü kiräkme? Bu eştä sezneñ kiläçäkkä ömetegez barmı, moña niçegräk

ireşergä telisez?

-Xalqıbız äytmeşli, ömetsez şaytan ğına. Bälki bu oçraqta ul turı kilep tä betmi torğanda. Çınlap ta soñğı yıllarda minem cämäğätçelektä alıp barğan eşem xäsrät däryasında buldı dip äytsäm döres buldı. Şul uq yarlıqaw komissiäsendä häm xalıq deputatı bulğan çaqta, miña çınlap ta tormışıbıznıñ nigezen täşkil itä torğan iñ ähämiätle mäs’älälärne kütärergä turı kilde. Şularnıñ berse Tatarstanda demografik xäl turında. Bu sannarnı iskä töşerä başlasañ çäçläreñ ürä toraçaq. Ämma küpmesender ul waqıtta uq işetterep beterü mömkin tügel ide. Şuña kürä dä bu palatağa cämğiät häm däwlät aldında da cämğiätne borçığan mäs’älälärne borçığan kisken itep quyarday keşelär saylandı. Bälki bezneñ tawışlar işeteler dip uylıym min. Çönki äle bit nığıtıp eşkä totınmağan bu palata.

Äye, menä sez yarlıqaw komissiäsen iskä töşerdegez. Miña monda bügenge yäşlärneñ qotoçqıç yazmışları belän oçraşıp torırğa turı kilä. Kübese alarnıñ narkomaniäneñ äsirläre häm şul kileş törmälärgä elägälär. Älbättä bu bezneñ Tatarstan öçen genä kilgän afät tügel, bu böten dönya külämendäge afät. Älegä cämäğätçelekneñ tawışı işetelmi, nıq tawış bulğanda anı bezneñ xakimiät işetergä tieş.

Bügenge köndä böten keşelek dönyası aldında torğan awır problemalarnı çişüdä min üzebezneñ xalıqqa, anıñ ruxına, köçenä häm ğomumän Respublikabızğa, anıñ citäkçese Prezidentıbız Mintimer Şäymievqa ışanam, şuña kürä minem ömetem zur.

Soñğı ike – öç yılda matbuğatta häm cämäğätçelek arasında sirägräk kürengän Roza Tufitullovanıñ zur säyäsi orbitağa çığarıluı Tatarstan häm tatar xalqı öçen zur waqiğa. Täcribäle säyäsätçelär fikerençä, Roza Tufitullovanıñ milli üseşkä, demokratiägä qaraşları häm jurnalistikada, säyäsättä tuplağan täcribäse ataqlı keşelärdän torğan Rusiä ictimaği palatasınıñ eşçänlegenä tä'sir itäçäk.

Gölnaz Şäyxetdinova

XS
SM
MD
LG