Accessibility links

Кайнар хәбәр

Jurnalistlarnı uıldıq belän awız yomdıralar


Звезда Поволжья gäzite yıl buyına ayırım ber dairä keşelären şaqqattırıp bardı. Kem milli mäsälälär, respublika säyäsi tormışındağı üzara köräş işe äyberlär belän qızıqsına, alar hiç şiksez Звезда Поволжья gäziten uqıp bardılar. Ä uqımağannarnı Azatlıq tanıştırıp bardı. İñ qızıqlı yazmaları belän.

Gäzitneñ bu yıldağı soñğı sanı da şundıy yazmalar belän tulğan. Ğädättägeçä, berençe bitendä iñ sallı yazma baş möxärrirneke. Ul bik ğadi atala: Ätäç yılı. Süz şulay uq respublikadağı säyäsi wäzğıät turında. Ayırım alğanda Qazan xakimiäte häm deputatlarınıñ aldağı yıl turında söyläşüläre xaqında. Ä ul aldağı yıl digännäre Qazan öçen şaqtıy qatlawlı bulaçaq ikän. Gäzittän özek:

Qazan şähär başqarma komitetı räise Metşin şähärneñ 12 milliard sum burıçı bar dip belderde. Ä Qazannıñ kerem öleşe ber yılğa 4 milliard sum ğına. Kamil İsxaqov wazifaların Räfis Borhanov başqaraçaq. Dumada eçke kierenkelek barlığı sizelde. Metşin, Qazan deputatları häm başqarma xakimiäte arasında tawış quzğatırğa mataşu – uñışsızlıqqa ireşäçäk dide. Häm, Bezdä büdjet häläkäte, bez biş yıl eçendä burıçlarnı tüläp beterergä tieşbez. Ä sez monda betergeç belän flomaster büleşep utırasız dip tänqitläp aldı.

Gäzit yazuınça, Qazan meriäsendäge 2500 xezmätkärne 1260 qa ğına qaldıru küzdä totıla. Älegä qädär şähär törle prefekturalarğa bülengän ide. Alar da betereläçäk. Yazma avtorı, Qazan Duması üz östenä alğan wazifalarnıñ yartısın aqça belän tä''min itälmi ikän. Şuña kürä, elekkege başlıq Kamil İsxaqov 12 şundıy wazifadan baş tarmaqçı bulğan. Yäğni, aqça taba almıy torğan eşlärne respublika xakimiätenä birergä. Menä monısına minem aqça yuq, Qazannıñ bu öleşen sez qarağız gospodalar digän formada. Läkin, Kamil İsxaqov urınına saylanğan Räfis Borhanov, bez radikallar tügel, östebezgä alğanbız ikän, tartıp baraçaqbız dip beldergän. Şul uq waqıtta kadrlar üzgäreşe zur bulaçaq ta digän. Gäzittän tağın ber özek:

Şul uq waqıtta Dumağa saylanğan ike deputat wazifalarınnan baş tarttılar. Militsioner Nurğayaz Äkbärov häm “Ritual” dip atalğan şirkät citäkçese Rawil Kärimov. Üzennän-üze sorala: ni öçen bu keşelär oktäber ayında köräşä-köräşä deputat buldılar soñ? Küräseñ, alar urınına Metşinnıñ yaña urınbasarları saylanır. Şul uq waqıtta, Metşin Duma başlığı bulırğa mömkin, ä başqarma xakimiätkä Borhanov kiler. Älegä İlsur Metşin, yaña wazifasına künegep kenä kilä.

Gäzit menä şundıy räsmi dairä serlärenä açıqlıq kertep mataşa bu sanında.

Monnan tış, gäzitneñ uquçılar yaratıp uqıy torğan tağın ber rubrigında, yañalıqlar öleşendä qızıqlı xäbärlär bar. Mäsälän, yaña yılnı säbäp itep, Respublikanıñ qayber jurnalistları nindi büläklärgä iä bulğan. Gäzittän özek:

Qazan milli-mädäni üzägendä Tatmediä agentlığı tarafınnan oyıştırılğan, jurnalistlar öçen banket ütte. Älege banketta, saylap alınağan jurnalistlar öçen büläklär patşalarça ide. Tatmediä başlığı Marat Moratov qulınnan jurnalistlar 600 gramlı ber banka qızıl uıldıq, 200 gramlı qara uıldıq, bik tä qimmätle bulğan Henessi konyağı, şulay uq qimmätle wiski, bal häm başqa rizıqlar belän bergä 10nar meñ sum aqça da aldılar. Jurnalistlar Tatmediä agentlıgın küz yäşläre belän maqtadılar. Mondıy xälneñ jurnalistlar tormışında bulganı yuq ide.

Tıñlawçılarıbıznıñ iskärtäbez, Azatlıq mondıy xökümät büläklärenä layıq bulmadı. Bez turılıqnı yaratabız, ikralar belän genä awıznı tomalaw bulmas inşalla.

Звезда Поволжья gäzite menä şundıy mäğlümatlar belän gäziteneñ soñğı sanın tutırğan. Älege bäysez gäzit kiläse yılda da serle dönyanı açudan tuqtamas.

Räfis Cämdixan

XS
SM
MD
LG