Accessibility links

чәршәмбе, 7 декабрь 2016, Казан вакыты 00:49

Balalarnıñ teläge qabul bulırmı?


Yaña yıl bäyrämnäre härkem öçen yaña ömet, xıyallar, şatlıqlar belän bäyle bula. Bigräk tä bala çaqta bu bäyräm şundıy tılsımlı toyıla. Ul waqıtta xıyallarnı çıñğa aşırıp, qış babay kilüenä ışanasıñ bit. Ğailä nazın kürmiçä üskän balalar öçen bu bäyräm ayıruça qäderle bula. Balalar anı yıl buyı ömetlänep kötä. Alarnıñ küñelläre ni telägänen belüe awır tügel inde anısı. Ämma şuşı sabıylarnı şatlandıru, yöräk yarsuların berniqädär basu öçen Yaña yıl büläkläre dä yärdäm itä.

Soñğı aralarda Tatarstanda zur-zur säwdä üzäkläre açılıp qına tora. Şularnıñ qayberlärendä maxsus xäyriä çırşıları tora. Çırşıda isä uyınçıqlar tügel, ä teläklär, xıyallar tulı täbriklämälär elengän. Tandem häm Yujnıy gipermarketlarınnan paket-paket aşamlıqlar töyep çıqqanda, keşelär älege çırşılar yanında tuqtap, yätim häm ğärip balalarnıñ qış babayğa yazılğan samimi teläklären uqı. Kemder bu teläklärne tormışqa da aşırırğa tırışa. “Yöräktän yöräkkä” dip atalğan xäyriä waqıfı älege aksiäne bıyıl ikençe tapqır uzdıra. Ämma bu izge eşkä här säwdä yortı rizalaşmıy dide waqıf citäkçelegendä eşläwçe Aida Anisimova. Här keşeneñ dä büläklärne balanıñ üzenä tapşırırğa mömkinlege yäki waqıtı bulmıy. Şunlıqtan alarnı säwdä yortı administratsiäsendä qaldırıp kitälär. Ä bu bilgele artıq mäşäqät.

Teläklär çırşısı aksiäse yärdämendä moxtac balalar häm yärdäm itärgä äzer buluçılar ber-bersen taba. Yärdäm itüçelär arasında törle şirkätlär, şäxsi eşmäkärlär bar. Yätimnär yortına balalar telägän uyınçıqlar, täm-tomnarnı alıp kilgändä, alar andağı balalarnıñ niçek ğömer itüen dä kürä. Häm mömkin qädär yärdäm itä. Ä qayber şirkätlärdä xätta böten xezmätkärlär dä bu eşkä cälep itelä häm ayırım ber yätimnär yortındağı balalarnıñ teläklären tormışqa aşıra, dide Aida Anisimova.

Yätimnär, ğärip balalar tärbiälänüçe yort xezmätkärläre belän elemtägä kerdek. Alarnıñ qayberläre balalarnıñ “Teläklär çırşısı” aksiäse aşa büläklär aluın äytte. Ä beräwlär isä bu xaqta işetmägän dä bulıp çıqtı. Bıyılğı Yaña yıl bäyräme här balağa da büläk, söyeneç alıp kilerme?

Al'bina Zäynulla

XS
SM
MD
LG