Accessibility links

чәршәмбе, 7 декабрь 2016, Казан вакыты 13:27

Başqortstan milli oyışmaları eşlärenä yomğaq yasadı


Başqortstandağı başqort milli oyışmaları citäkçeläre üzläreneñ bıyılğı soñğı utırışların ütkärde. Anda 2005 yılda başqarılğan eşlärgä yomğaq yasaldı häm kiläse yılğa kön tärtibendä qalaçaq burıçlar isemlege ataldı.



Başqort milli xäräkäte liderları äytüençä, bıyıl respublikadağı başqort milli oyışmaları wäkilläre millät öçen baytaq qına faydalı ğämällär başqarğan. Şuşı isäpkä alar Başqortstan mäktäplärendä häm törle uqu yortlarında başqort telen uqıtunı arttıru .yünäleşendä başqarğan eşlären äytä. Mäğlüm buluınça, Başqortstan parlamentı küptän tügel respublikadağı “Mäğärif turındağı” qanunğa üzgäreşlär kertep, respublika mäktäplärendä barlıq millät balaları da başqort telen mäcbüri öyränergä tieş, digän maddäne kertte. Ä respublika mäğärif ministrı Zöhrä Räxmätullina üzeneñ 21 noyäberdäge färmanı belän şuşı qanunnı ğämälgä aşıra başlawğa fatıyxa birde. Menä şuşı eştä başqort milli oyışmaları liderları üzläreneñ dä zur öleşe barlığın äytä.



İkençe zur qazanış itep, Başqortstandağı başqort milli oyışmaları citäkçeläre Ufanıñ äle räsmi kürsätelüçe yäşennän küpkä

borınğıraq buluın isbat itü yünäleşendä başqarğan eşlären atıy. Elegräk tä xäbär itelüençä, başqort ğalimnäre, ayırım alğanda, Başqortstan Xalıqları assambleyası räise Niaz Mäcitov Ufanı Qazannan da borınğıraq şähär dip belderä häm Ufağa kimendä 1,5 meñ yıl dip raslıy. Şuşı uq fikerne başqort milli oyışmaları da ruxlanıp yaqlıy häm Ufanıñ borınğı şähär buluın isbat itü öçen bar köçlären salaçağın äytä. Bu eş öçen Başqortstan Xökümäte xätta 10 million sum aqça da bülde.



Başqort milli oyışmaları liderları kiläse yılğa bilgelägän burıçları arasında Başqortstannıñ Rusiägä üz irege belän quşıluınıñ 450 yıllıq yübileena äzerlek eşlärendä aktiv qatnaşunı iñ möhimnärneñ berse dip sanıy. Älege yubileyğa äzerlek qısalarında federal' üzäk belän Başqortstan Xökümäte cämğısı 66 milliard sum aqça küçeräçäk. Menä şul aqçalardan da başqort milli oyışmaları üz mädäni proyektları öçen öleş çığar dip ömetlänä.



Uzğan atnada Başqortstandağı tatar milli oyışmaları da üzläreneñ berlektäge cıyının ütkärgän ide. Başqort milli oyışmalarınıñ şuşı yılğa yasağan optimistik yomğaqlarınnan ayırmalı bularaq, tatar oyışmaları wäkilläreneñ yıl näticäläre bik ük küñelle tügel. Başqortstanda tatar telen yaqlaw häm tatar telenä däwlät tele statusı alu buyınça yartı adım da yasalmadı, dip belderä alar. Tatar mäktäpläre, tatar gimnaziäläre açu täñgälendä dä bernindi yañalıq ta bulmağan, kiresençä, elekke tatar mäktäplärendä dä tatar balaların başqortça uqıtuğa küçerü bara. Şuşı ğämällärdä Başqortstan tatar milli xäräkäte liderları respublikanıñ räsmi xakimiätlären ğäyepli. Şuşı säyäsät artaban da däwam itsä, tatar belän başqort mönäsäbätläreneñ bozıluın farazlıy tatar cämäğätçelege wäkilläre.



Bıyılğı yılda üzläre öçen dä iñ istälekle waqiğa, dip Başqortstan tatar cämäğätçelege Qazannıñ 1000 yıllıq yübileyın isäpli. Yubiley könnärendä häm annan soñ, maturlanğan, bik nıq tözeklängän Qazannı kürergä Başqortstannan meñnärçä millättäş barıp qaytqan. “Qazannıñ däräcäse artuı barlıq tatarlar öçen, şul isäptän bezneñ öçen dä zur ğorurlıq”, - dip belderä Başqortstan tatarları.

Fänis Fätxi, Ufa.

XS
SM
MD
LG