Accessibility links

пәнҗешәмбе, 8 декабрь 2016, Казан вакыты 11:00

Tatarstan xalqı yaña yıl qarşılawnı qayda qulayraq kürä?


Yaña yılnı törle illärdä törleçä itep qarşılıylar. Äytik, Qıtaylılar, Yaña yılnı 17 ğinwar häm 19 fevral' arasında ay tulğan waqıtta qarşılıy. Xalıq uramğa çığıp, yulnı fonar'lär belän yaqtırta. Qıtayda yäşäwçelär fikerençä, Yaña yılnı uzdırırğa yawız ruxlar qomaçawlıy. Şuña kürä keşelär alarnı şartlatqıçlar belän qurqıtıp qualar. Ä qaywaqıt qıtaylılar, yawız ruxlarnı yortqa kertmäs öçen, täräzälärne käğäz belän dä qaplıy. Yaponiädä isä, Yaña yılnı 1 ğinwarda ütkärälär. Yaponnar İske yılnı ozatu protsessına zur ähämiät birä. Anı ozatqanda duslarnı mäcleslärgä çaqıru, bergä restoranğa baru ğädätkä kergän. Yaña yıl başlanır minutta yaponnar kölä başlıy. Alar ışanuınça, kölü Yaña yılda bäxet kiterä. Yort eçendä dögedän peşerelgän kümäç quyalar, anıñ östenä bäxet, sälämätlek häm ozın ğömer simvolı bulğan mandarinnar salalar. Yaponiädä çırşı yarımutrawda üsä torğan cimeşlär belän bizälä.

Hindstanda Yaña yıl bäyrämen yılğa dürt märtäbä uzdıru milli üzençälek dip sanala. Bilgele bulğança, bu ildä bik küp mädäniätlär kiseşkän. Anda xristiannar, möselmannar, budda dinen totuçılar yäşi. Şul uq waqıtta xalıqnıñ kübese - induizm dinenä ışanuçılar. Alar Yaña yılnı üz kalendar’ buyınça qarşılıy. Yaña yıl - Buryatiädä dä kiñ taralğan bäyrämnärneñ berse. 20 kön däwamında bara torğan tantanada buryat xalqı ber-bersenä tınıçlıq, iminlek häm bäxet teli. Yaña yıl tabını aq tösle rizıqlardan äzerlänelä. Ayıruça söt, sır, eremçek kebek aşamlıqlarğa östenlek birelä. Yaña yılnı irtänge yaqtan qarşılıy başlıylar.

Menä şulay itep, yaña yılnı här cirdä törleçä qarşılıylar. Ä menä Tatarstan xalqı yaña yıl qarşılawnı çit illärdä, yäisä üzebezdä qulayraq kürä mikän? Bu soraw belän bez Qazannıñ berniçä säyäxät şirkätlärenä möräcäğät itep qaradıq. “Salawat” säyäxät şirkäte citäkçese Qamil Tärcemanov bu turıda bezgä tulıraq mäğlümat birde.

“Kiläçäk yaña yıl bäyrämnärgä bik bay buldı, şuña kürä säfärgä dä çığuçılar şaqtıy. İñ küñelle cirlär bezneñ watandaşlar öçen Gäräp Ämirlekläre, Misır, Tayland, Mayämi. Şulay uq Avstriä, Germaniägä bik küp keşelär kitte, anda xäzer çañğı şuu waqıtı. Bäyräm könnäre bik ozın bulğanlıqtan küplär yal itärgä balalar belän bergä kitälär. Bez täqdim itkän yal itü cirläre ul bezneñ tuğan yaqlar. Şuña kürä hawa torışların üzgärtmiçä yal itep bula”.

İşetüegezçä, Yaña yılnı çittä qarşı aluçı Tatarstanlılar kübesençä Misırğa, Tayland, Gäräp Ämirlegenä kitkännär. Şulay da, Qazan artında yaña 2006 yılnı qarşı alırğa teläwçelär tabılğan. Yaña yılda millättäşlärebezne, bigräk tä yäşlärne qızıqlı säyäxät, kötelmägän oçraşular, ğibrätle xällär kötä. Säyäxätlär imin bulsın, alardan urap qaytuçılar, bezgä häm tıñlawçılarıbızğa qaytıp söyälsennän, Azatlıq mikrofonı alar öçen härwaqıt açıq.

Gölnaz Şäyxetdin

XS
SM
MD
LG