Accessibility links

дүшәмбе, 5 декабрь 2016, Казан вакыты 19:41

«İslam awazı» fondı «Arbat» isemle küñel açu kompleksında yäşlär öçen oçraşu kiçäse oyıştırdı


Äytergä kiräk, mondıy biyü kiçäläre şähärebezdä berençe tapqır ğına uzdırılmıy. 90 nçı yıllarda «Tuğan tel» oyışması Oçraşunı, soñraq «Tanış bulıyq» dip atalğan yäşlär kiçäsen daimi oyıştırıp kilä ide. Tatar mädäni üzäge isemle räsmi oyışma tözelgäç, oçraşu kiçäläre äkrenläp süreldelär.

Oçraqlı räweştä genä mondıy kiçälär 90нчы yıllar axırında – 2000 nçe yıllar başlarında da bulğaladı. «İslam awazı» fondı prezidentı İlgiz Nasıybullov, Pedagogiä universitetı talibı İldar Ramazanov, «Abordaj» icat törkemeneñ citäkçese Azat Sanatullin da şähärebezneñ törle küñel açu komplekslarında tatar yäşläre öçen Biyü kiçälären oyıştırıp mataştılar, ämma yäşlär az kilü säbäple bu kiçälär berle-ikele genä bulıp qaldılar.

Bu yulı, iğlannarda maşina wäğdä itelgängäme, yäşlärneñ üz millät wäkilläre belän aralaşu teläge üskängäme, ütkän yıllarğa qarağanda yäşlär kübräk kilgännär. İke zur zal şığrım tulğan. Kiçäneñ ayırım teması buldı: «Yäşlär narkotiksız». Şuña kürä äledän äle narkotikka qarşı köräşüçe cämğiätlärneñ citäkçeläre, şähär meriyäseneñ yäşlär komitetı räise Aleksandr İvanov häm törle milli cämğiät wäkilläre çığış yasadılar. Tatar yäşlärenä keçkenä genä konsert ta äzerlängän ide: Rinat Sadıyqov häm Alsu Salaxova alarğa üzläreneñ cır-moñnarın büläk ittelär, «Sember» cır-biyu ansamble törle xalıq iyüllären kürsättelär.()

Şulay uq çara barışında bäygelär, uyınnar oyıştırıldı. Jır konkursında ciñep çığuçığa maşina wäğdä itelgängä, yäşlär bu yarışta bik teläp qatnaştılar: äti-änilärennän, magnitofon tasmalarınnan işetep istä qaldırğan cırlarnı başqardılar. Zal alarğa quşılıp cırladı. Soñınnan zalda utıruçı tamaşaçılarnıñ alqışları buyınça ciñüçe bilgelände. Pedagogiä universitetınıñ matematika-informatiqa fakul'tetınıñ studentçası Läysän Molotkova ciñüçe dip iğlan itelde. Aña İlgiz Nasıybullov bäyrämçä bizälgän uyınçıq maşina büläk itte.

«Sin tatar telen beläseñme?» digän yarış da yäşüsmer tamaşaçılarnıñ küñelenä xuş kilde. Tatar xalqınıñ mädäniätenä, tarixına qağılışlı sorawlarğa yäşlär berawızdan cawap birdelär. Bäyrämneñ iğänäçeläre dä tarafınnan bik küp büläklär äzerlängän ide, şuña kürä berse dä büläksez qalmadı. Tik şulay da, yäşlärneñ fikerençä, bäyrämdä milli rux citärlek däräcädä sizelmägän.

Çulpan Firğaliewa, Sember.

XS
SM
MD
LG