Accessibility links

якшәмбе, 11 декабрь 2016, Казан вакыты 03:22

Bali klimat cıyını däwam itsä dä älegäçä urtaq kileşü yuq


Indonezia -- BMO Klimat üzgäreşe cıyını

Indonezia -- BMO Klimat üzgäreşe cıyını

Indoneziäneñ Bali utrawında BMOnıñ klimat üzgäreşe mäsäläsenä bağışlanğan xalıqara cıyını irtägä tämamlanaçaq. Älegä bu cıyında da qatnaşuçı illär arasındağı kileşmäwçänleklärgä çişeleş tabılmadı.



Cıyılış 2012 yılda Kyoto kileşüeneñ möddäte çığu belän dönyaküläm cılınuğa qarşı yaña qısalarnı bergäläp bilgeläw maqsatında uzdırıla. Yewropa Berlege, köçle sänäğate bulğan illär 2020 yılğa qadär, yapma gazları çığarunı 25-40 %qa kimetergä tieş dip taba. AQŞ, Rusiä häm Yaponiä isä bu täqdimgä qarşı çığuçı illär arasında tora.

Bıyıl BMO klimat belgeçläre tarafınnañ çığarılgan xisaplarında, dönyağa kümer gazı taraluı kimetelmäsä, alğa taba monın dönyağa bik tiskäre yoğıntısı bulaçaq digän kisätülär yañgırıy. Bu xisaplarda, naçar hawa şartları, diñgez taşuları häm qaysı ber canlı törläreneñ yuqqa çığuı kekek dönyağa yanağan qurqınıçlar turında añlatılğan ide.

BMO utırışında, Nobel büläge iäse elekke Amerikan vitse prezidentı Al Gore, 2020 yılğa qadär, yapma gazlarnı 1990 yıllardağı külämgä yäğni 25-40 % kimetergä çaqırdı.

Bu sannar Bali konferansı aldınnan cibärelgän ölgedä dä belderelgän ide. Läkin sänäğati illär eçendä Kyoto kileşüen xäzerdän uq yañartırğa telämägän berdän ber il Amerika. AQŞ, äle mondıy maqsatlarnı xäzerdän uq belgeläp quyırğa irtä, Bali söyläşüenä barı tik bulası çikläwlär aldınnañ, söyläşülärdä başlangıç ber adım bularaq qararğa tiyeş dip däğwä itä.


Aq yort süzçese, Dana Perino, Amerikanıñ bu cıyılışqa bulğan mönäsäbäten bolay taswirlıy:

“Cıyınnıñ asıl maqsatı yaña qısalarnı barlaw, 2012 yıldan soñ bulaçaq qısalar xaqında tağın kiläse yıllarda utırıp söyläşeler, kileşülär qaralır. Bali cıyınınıñ maqsatı da bu, moña nigez äzerläw. Şuña bu konferansta, cıyın ölgesendä gaznı kimitü qısasın baştan uq belgelänep quyıluı barı tik AQŞ qına ğacäpländermäde. Bez moñın belän kileşmibez çönki xäzerge waqıtta monı qabul itärgä äle bez äzer tügel. Bez bu-eşe söyläşülärne kiläse yılnı uzdıraçağıbıznı beldergän idek.”

Monıñ Yewropa berlege belän AQŞnı nizaqqa etäräçäge turında farazlar bar. Yewropa berlege ägär Waşintoñ, yapma ğazlar taraluı turında anıq maqsatlar quymasa, kiläse ay bulaçaq AQŞ citäkçelegendäge kilimat cıyınııñ boykot itäçägen belderä.

AQŞ Sintäbr ayında, dönyada iñ küp yapmağaz çığaruçı 16 il, belän, 2008 yılda ayrı ber cıyılış uzdıraçağın beldergän ide.

Waşiñton şul uq waqıtta AQŞ citäkliyäçäk söyläşügä, Kyoto kileşüenä kertelmägän Hindstan belän Qıtaynı bu cıyılışqa qatnaşırğa çaqırdı. Bu ike il hawanı iñ küp pıçratqan illär rätendä bulsa da, alar Kyoto kileşüendä äle iqtisadi üseşkä citmägäne öçen Kyoto çikläwläre alarğa qağılmıy ide.
XS
SM
MD
LG